ചെറുവത്തൂര്‍: കൈതക്കാട് മഹല്ല് ജമാഅത്ത് കമ്മിറ്റിക്കു കീഴില്‍  ആരംഭിക്കുന്ന തര്‍ബിയ തഹ്ഫീളുല്‍ ഖുര്‍ആന്‍ കോളജ് നാളെ  രാവിലെ പത്തിന് പാണക്കാട് സയ്യിദ് ഹാശിറലി ശിഹാബ് തങ്ങള്‍ ഉദ്ഘാടനം  ചെയ്യും. സ്‌കൂള്‍ ഏഴാം ക്ലാസ് വിജയിച്ച വിദ്യാര്‍ഥികളില്‍ പ്രവേശന പരീക്ഷയില്‍ കൂടുതല്‍ മാര്‍ക്ക് നേടിയ 24 പേര്‍ക്കാണു പ്രവേശനം.
മൂന്നു വര്‍ഷം കൊണ്ട് ഖുര്‍ആന്‍ മനഃപാഠമാക്കുകയും തുടര്‍ന്ന് എസ്.എസ്.എല്‍.സി അടക്കമുള്ള പരീക്ഷയെഴുതി തുടര്‍ പഠനത്തിന് അവസരം നല്‍കുകയും ചെയ്യുന്ന പാഠ്യപദ്ധതിയാണ് തര്‍ബിയ കോളജില്‍ നല്‍കുക. കൈതക്കാട് ഖിളര്‍ മസ്ജിദ് അങ്കണത്തില്‍ നടക്കുന്ന ഉദ്ഘാടന ചടങ്ങില്‍ മഹല്ല് പ്രസിഡന്റ്  എം.സി ഇബ്‌റാഹീം ഹാജി അധ്യക്ഷനാകും. എസ്.കെ.എസ്.എസ്.എഫ് സംസ്ഥാന വൈസ് പ്രസിഡന്റ്  മുസ്ഥഫാ അശ്‌റഫി കക്കുപ്പടി  മുഖ്യ പ്രഭാഷണം നടത്തും. തുടര്‍ന്ന് മജ്‌ലിസുന്നൂറും കൂട്ടു പ്രാര്‍ഥനയും നടക്കും.
ഹിബത്തുള്ളാ ഹുദവി, ഇല്‍യാസ് ഹുദവി, ശാകിര്‍ ദാരിമി, ഹംസ ഫൈസി  പങ്കെടുക്കും. വാര്‍ത്താസമ്മേളനത്തില്‍ എം.സി ഇബ്‌റാഹിം ഹാജി, പി.വി മുഹമ്മദ് കുഞ്ഞി ഹാജി, ലത്വീഫ് നീലഗിരി, അബ്ദുല്‍ അസീസ് ഹാജി, മുനീര്‍ ഹുദവി പങ്കെടുത്തു.