പേരാമ്പ്ര: തെരുവ് നായ്ക്കള്‍ കൂട്ടത്തോടെ വിഹരിക്കുന്നത് വര്‍ധിക്കുന്ന സാഹചര്യത്തില്‍ ജനങ്ങള്‍ പ്രയാസത്തില്‍. അതി രാവിലെ ട്യൂഷന്‍ ക്ലാസില്‍ പോകുന്ന വിദ്യാര്‍ഥികളേയും യാത്രക്കാരേയും നായ്ക്കള്‍കൂട്ടത്തോടെ ആക്രമിക്കാന്‍ എത്തുന്നത് പതിവായതോടെ രക്ഷിതാക്കള്‍ ബന്ധപ്പെട്ട പഞ്ചായത്ത് ഭരണസമിതികളുടെ മുമ്പില്‍ പരാതികളുമായി എത്തിയിരുന്നു.
 എന്നാല്‍ ശാശ്വതമായ പരിഹാരം കാണാന്‍ കഴിയാതെ പഞ്ചായത്ത് അധികൃതര്‍ മൗനം നടിക്കുകയാണെന്ന് ജനങ്ങള്‍ കുറ്റപ്പെടുത്തുന്നു.
നേരത്തെ പുലര്‍ച്ചക്ക് നടക്കാനിറങ്ങുന്നവരേയും ഇതര സംസ്ഥാന തൊഴിലാളികളേയും നായ്ക്കള്‍ ആക്രമിച്ചത് ബന്ധപ്പെട്ട ഉദ്യോഗസ്ഥരുടെ ശ്രദ്ധയില്‍ പെടുത്തിയിരുന്നു.
അടഞ്ഞകട വരാന്തകളും മത്സ്യമാംസ മാര്‍ക്കറ്റ് പരിസരങ്ങളും നായ്ക്കളുടെ താവളമാണ്. മത്സ്യമാംസ മാര്‍ക്കറ്റിലെ അവശിഷ്ടങ്ങള്‍ യഥേഷ്ടം ലഭിക്കുന്നത് കാരണം ഇവിടെ തന്നെ നായ്ക്കള്‍ വിഹാരകേന്ദ്രമാക്കുകയാണ്.
നേരം പുലരുന്നതോടെയാണ് കൂട്ടമായി ഇവ അലഞ്ഞു തിരിഞ്ഞ് നടക്കുന്നതും അക്രമണപ്രവണതകള്‍ കാണിക്കുന്നതും.
നേരത്തെ നായ്ക്കളുടെ ശല്യം വര്‍ധിച്ചപ്പോള്‍ പടക്കം പൊട്ടിച്ചെറിഞ്ഞ് അകറ്റാന്‍ നാട്ടുകാര്‍ ശ്രമിച്ചത് ഫലം കണ്ടിരുന്നു.
ഇപ്പോള്‍ വീണ്ടും ശല്യം വര്‍ധിച്ചിരിക്കുകയാണ്.