പനമരം: പഞ്ചായത്തിന്റെ മുന്നില്‍ നിന്ന് തുടങ്ങുന്ന തീരട്ടാടി റോഡില്‍ മലിന ജലം കെട്ടിക്കിടക്കുന്നത് നാട്ടുകാര്‍ക്കും കാല്‍നട യാത്രക്കാര്‍ക്കും ദുരിതമാകുന്നു.
റോഡില്‍ എല്‍.പി സ്‌കൂളില്‍ മതിലിനോട് ചേര്‍ന്നാണ് മലിനജലം കെട്ടി കിടക്കുന്നത്.
ഇതോടെ ഇവിടം കൊതുക് വളര്‍ത്തല്‍ കേന്ദ്രമായിരിക്കുകയാണ്. മഴയില്ലാത്ത അവസരങ്ങളിലും ഇവിടെ വെള്ളം ഒഴിഞ്ഞ് പോകാറില്ല.
സ്‌കൂളിന്റെ സമീപത്തെ കുന്നിനോടനുബന്ധിച്ച് വീടുകള്‍, സ്ഥാപനങ്ങള്‍ എന്നിവിടങ്ങളില്‍ നിന്നുള്ള മലിന ജലമാണ് റോഡില്‍ ഒഴുകിയെത്തുന്നത്.
റോഡ് പൊതുവെ വീതി കുറഞ്ഞതാണ്. ഇതുവഴി വാഹനങ്ങള്‍ കടന്ന് പോകുമ്പോള്‍ കാല്‍നടയാത്രക്കാര്‍ക്ക് റോഡരികിലേക്ക് മാറിനില്‍ക്കാന്‍ പോലും കഴിയാത്ത അവസ്ഥയാണുള്ളത്.
ഈ ഭാഗങ്ങളില്‍ ഓവുചാലുകള്‍ ഇല്ലാത്തതാണ് പ്രധാന പ്രശ്‌നമായിരിക്കുന്നത്. ഓവുചാല്‍ നിര്‍മിച്ച് പ്രശ്‌നം പരിഹരിക്കാന്‍ അടിയിന്തര നടപടിയുണ്ടാകണമെന്നാണ് നാട്ടുകാരുടെ ആവശ്യം.