മാവൂര്‍: കഴിഞ്ഞ ദിവസം ചെറുപുഴയോരത്ത് പ്ലാസ്റ്റിക് മാലിന്യങ്ങള്‍ തള്ളിയ വ്യാപാരസ്ഥാപനത്തിനെതിരേ പൊലിസ് കേസെടുത്തു. കോഴിക്കോട് നടക്കാവിലെ ഡെ മാര്‍ട്ട് എന്ന കച്ചവട സ്ഥാപനത്തിനെതിരേയാണ് പഞ്ചായത്ത് അംഗം യു.എ ഗഫൂറിന്റെ പരാതിയില്‍ പൊലിസ് കേസെടുത്തത്.
 പത്തോളം പ്ലാസ്റ്റിക് ചാക്കുകളില്‍ കെട്ടിയാണ് തെങ്ങിലക്കടവ്-ചെറൂപ്പ ലിങ്ക് റോഡില്‍ മാലിന്യങ്ങള്‍ തള്ളിയിരുന്നത്. മാവൂര്‍ പഞ്ചായത്തിനെ പ്ലാസ്റ്റിക് മുക്തമാക്കിയുള്ള പ്രഖ്യാപനം നടത്തി ദിവസങ്ങള്‍ക്കകം വന്‍തോതില്‍ പ്ലാസ്റ്റിക് മാലിന്യം തള്ളിയത് പ്രതിഷേധത്തിനിടയാക്കിയിരുന്നു.
ചെറൂപ്പ-ഊര്‍ക്കടവ് റോഡ്, കോഴിക്കോട്-മാവൂര്‍ റോഡില്‍ ജനതാമസമില്ലാത്ത തെങ്ങിലക്കടവിന്റെയും കല്‍പ്പള്ളിയുടെയും മധ്യഭാഗം, തെങ്ങിലക്കടവ്-പൈപ്പ്‌ലൈന്‍ റോഡ് തുടങ്ങിയ സ്ഥലങ്ങളിലാണ് ഇരുളിന്റെ മറവില്‍ മാലിന്യം തള്ളുന്നത്.
കഴിഞ്ഞദിവസം ചാക്കില്‍ കെട്ടി തള്ളിയ മാലിന്യം പരിശോധിച്ചപ്പോള്‍ കണ്ടെടുത്ത ബില്ലുകളാണ് പ്രതികളെ പിടിക്കാന്‍ സഹായകമായത്.
ഇതിനിടെ കടയുടമ ഒത്തുതീര്‍പ്പിനുള്ള ശ്രമം നടത്തിയെങ്കിലും ശക്തമായ നടപടിയുമായി മുന്നോട്ടു പോകുമെന്ന് പഞ്ചായത്ത് പ്രസിഡന്റ് സി. മുനീറത്ത് പറഞ്ഞു.