ഗുവാഹത്തി: ഖത്തര്‍ ലോകകപ്പ് ഫുട്‌ബോളില്‍ കണ്ണുംനട്ട് യോഗ്യതാ മത്സരത്തില്‍ ഇന്ത്യ ഇന്ന് താരതമ്യേന കരുത്തരായ ഒമാനെ നേരിടും. രാത്രി 7.30 ന് ഗുവാഹത്തിയിലെ ഇന്ദിരാഗാന്ധി അത്‌ലറ്റിക് സ്റ്റേഡിയത്താണ് മത്സരം. നിലവിലെ ഏഷ്യന്‍ ചാംപ്യന്‍മാരായ ഖത്തറിനൊപ്പം ബംഗ്ലാദേശ്, ഒമാന്‍, അഫ്ഗാനിസ്ഥാന്‍ എന്നിവരടങ്ങുന്ന ഗ്രൂപ്പ് ഇയിലാണ് ഇന്ത്യയുടെ സ്ഥാനം. 10 ന് കരുത്തരായ ഖത്തറുമായും ഇന്ത്യ ഏറ്റുമുട്ടും.
ക്രൊയേഷ്യന്‍ പരിശീലകന്‍ ഇഗോര്‍ സ്റ്റിമാക്കിന് കീഴില്‍ പരിശീലിക്കുന്ന ഇന്ത്യ ലോകകപ്പ് ബെര്‍ത്ത് നേടാനുറച്ച് മത്സരിക്കുമ്പോള്‍ ഇന്ത്യന്‍ ആരാധകര്‍ക്കത് ആവേശ രാവാകും. മുന്‍പ് അവസാനമായി ഏഷ്യന്‍ കപ്പിന് മുന്നോടിയായി ഇവര്‍ മുഖാമുഖമെത്തിയപ്പോള്‍ ഗോള്‍രഹിത സമനിലയില്‍ പിരിഞ്ഞിരുന്നു. ഇന്ന് നടക്കുന്ന മത്സരത്തില്‍ സന്ദേശ് ജിങ്കനൊപ്പം അനസ് എടത്തൊടിക പ്രതിരോധത്തില്‍ സ്ഥാനമുറപ്പിച്ചേക്കും. മധ്യനിരയില്‍ സഹല്‍ അബ്ദുസ്സമദും അനിരുദ്ധ് ഥാപ്പയും എത്തുമ്പോള്‍ സുനില്‍ ഛേത്രിക്കൊപ്പം മലയാളി ആഷിക് കുരുണിയലും മുന്നേറ്റ ത്തില്‍ ഇറങ്ങുമെന്നാണ് ടീം വൃത്തങ്ങള്‍ സൂചിപ്പിക്കുന്നത്.