ന്യൂഡല്‍ഹി: പള്ളിയുടെ മുഴുവന്‍ ഉടമസ്ഥാവകാശവുമുണ്ട് എന്നതിനര്‍ഥം തങ്ങള്‍ സഹവര്‍ത്തിത്വത്തിന് എതിരാണെന്ന് അല്ലെന്ന് ബാബരി മസ്ജിദ് നിലനിന്ന ഭൂമിയുടെ ഉടമസ്ഥതയെചൊല്ലിയുള്ള കേസില്‍ സുന്നി വഖ്ഫ് ബോര്‍ഡ്. 1858 മുതല്‍ എല്ലാവരും തോളോട് തോള്‍ ചേര്‍ന്നാണ് നിലകൊണ്ടിരുന്നത്. ആര്‍ക്കെങ്കിലും അവിടെ പ്രാര്‍ഥിക്കണമെങ്കില്‍ തങ്ങള്‍ അതിന് എതിരല്ല. പക്ഷെ, അതിന്റെ ഉടമസ്ഥാവകാശം തങ്ങള്‍ക്കുള്ളതാണ്. നിര്‍മോഹി അഖാഡയുടെ പരിപാലന അവകാശത്തെ തങ്ങള്‍ ചോദ്യം ചെയ്യുന്നില്ലെന്നും എന്നാല്‍ ഏതു ഭാഗത്താണ് അവര്‍ക്ക് ആ അവകാശമുള്ളതെന്നതാണ് തര്‍ക്കമെന്നും സുന്നി വഖ്ഫ് ബോഡ് അഭിഭാഷകന്‍ രാജീവ് ധവാന്‍ ചൂണ്ടിക്കാട്ടി.
രാംഛാബൂത്രയുടെ കൈകാര്യ കര്‍ത്താവകാശം അവര്‍ക്കുണ്ടെങ്കില്‍ അത് പുറത്തെ നടുമുറ്റത്തിലാണ്. 1885ല്‍ അഖാഡ അവിടെ പ്രാര്‍ഥിക്കാനുള്ള അവകാശത്തിനായാണ് കേസ് നല്‍കിയത്. അല്ലാതെ ഉടമസ്ഥാവകാശത്തിനല്ല. ഇസ്‌ലാമിക വ്യവസ്ഥ പ്രകാരം വഖ്ഫ് ചെയ്ത ഭൂമി ദൈവത്തിന്റെതാണ്. അവിടെ മറ്റൊരു വിഭാഗം സഹവര്‍ത്തിത്തത്തോടെ വസിക്കുന്നതില്‍ തെറ്റില്ല. പുറത്തെ മുറ്റത്തുണ്ടായിരുന്ന ഛാബൂത്ര പിന്നീട് പള്ളിയുടെ നടുമുറ്റത്തേക്ക് മാറ്റി. പിന്നീട് പള്ളിയുടെ മധ്യതാഴികക്കുടത്തിന് താഴെ രാമജന്‍മ ഭൂമിയാണെന്ന് വാദിച്ചു. അത് രാമജന്മസ്ഥാനമാണെന്ന് തുടക്കത്തില്‍ അഖാഡ അംഗീകരിച്ചിരുന്നില്ലെന്നും രാജീവ് ധവാന്‍ വാദിച്ചു.