വളാഞ്ചേരി: മജ്‌ലിസ് എജ്യുക്കേഷനല്‍ കോംപ്ലക്‌സിന് കീഴില്‍ പണി പൂര്‍ത്തീകരിച്ച മജ്‌ലിസ് വാഫി കോളജ് കെട്ടിടത്തിന്റെ ഉദ്ഘാടനം പാണക്കാട് ഹൈദരലി ശിഹാബ് തങ്ങള്‍ നാളെ നിര്‍വഹിക്കും. വൈകിട്ട് മൂന്നിന് നടക്കുന്ന ചടങ്ങില്‍ മദ്‌റസ അധ്യാപക രംഗത്ത് 50 വര്‍ഷം പൂര്‍ത്തീകരിച്ച ഹസ്സന്‍ ബാവ മാസ്റ്ററെ ആദരിക്കും.
മജ്‌ലിസ് എജ്യുക്കേഷനല്‍ കോംപ്ലക്‌സ് പ്രസിഡന്റ് പി.കെ അബ്ദു മുസ്‌ലിയാര്‍ അധ്യക്ഷനാകുന്ന ചടങ്ങില്‍ ജനറല്‍ സെക്രട്ടറി എം.പി മുസ്തഫല്‍ ഫൈസി സ്വാഗതം പറയും. മജ്‌ലിസ് ആര്‍ട്‌സ് ആന്‍ഡ് സയന്‍സ് കോളജ് സെക്രട്ടറി സി.പി ഹംസ ഹാജി റിപ്പോര്‍ട്ട് അവതരിപ്പിക്കും. ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റി വൈസ് ചാന്‍സലര്‍ ഡോക്ടര്‍ ബഹാഉദ്ദീന്‍ മുഹമ്മദ് നദ്‌വി മുഖ്യപ്രഭാഷണം നടത്തും. സി.ഐ.സി കോ ഓഡിനേറ്റര്‍ അബ്ദുല്‍ ഹക്കീം ഫൈസി ആദൃശ്ശേരി വാഫി സന്ദേശം നല്‍കും. പ്രൊഫ.ആബിദ് ഹുസൈന്‍ തങ്ങള്‍ എം.എല്‍.എ, കെ.എ റഹ്മാന്‍ ഫൈസി, കെ.എസ്.എ തങ്ങള്‍, കെ.കെ.എച്ച് തങ്ങള്‍, അബ്ദുല്‍ വാഹിദ് മുസ്‌ലിയാര്‍ അത്തിപ്പറ്റ, സലീം കുരുവമ്പലം, ഡോ.താജുദ്ദീന്‍ വാഫി തുടങ്ങിയവര്‍ ചടങ്ങില്‍ സംബന്ധിക്കും. മജ്‌ലിസ് ട്രഷറര്‍ ടി.പി മുഹമ്മദ് കുട്ടി ചടങ്ങില്‍ നന്ദി പറയും. മൂന്ന് നിലകളിലായാണ് കെട്ടിടം നിര്‍മിച്ചിരിക്കുന്നത്.