ഫറോക്ക്: ബസുകള്‍ തമ്മില്‍ കൂട്ടിയിടിച്ചതിനെ തുടര്‍ന്നു നിയന്ത്രണംവിട്ട സ്വകാര്യ ബസ് റോഡരികിലെ ഇലക്ട്രിക് പോസ്റ്റ് ഇടിച്ചു. പോസ്റ്റ് മുറിഞ്ഞ് ബസിനു മുകളിലേക്കു വീണെങ്കിലും യാത്രക്കാര്‍ പരുക്കില്ലാതെ രക്ഷപ്പെട്ടു.
ദേശീയപാതയില്‍ രാമനാട്ടുകര പുളീഞ്ചോട് വളവില്‍ ഇന്നലെ രാവിലെ ഏഴിനാണു സംഭവം. കോഴിക്കോട്ടു നിന്ന് വഴിക്കടവിലേക്കു പോകുകയായിരുന്ന വിജയ് ബസിന്റെ പിന്നില്‍, കാളികാവില്‍ നിന്ന് കോഴിക്കോട്ടേക്കു വരികയായിരുന്ന പി.എ.എസ് ബസ് ഇടിക്കുകയായിരുന്നു. തുടര്‍ന്ന് പി.എ.എസ് ബസാണ് ഇലക്ട്രിക് പോസ്റ്റിലിടിച്ചത്. പെട്ടെന്നു വൈദ്യുതിബന്ധം നിലച്ചതു കാരണം വന്‍ ദുരന്തം ഒഴിവായി.
സംഭവത്തെ തുടര്‍ന്ന് ദേശീയപാതയില്‍ ഏറെനേരം ഗതാഗതം തടസപ്പെട്ടു. നാട്ടുകാര്‍ ചേര്‍ന്നാണു ഗതാഗതകുരുക്ക് പരിഹരിച്ചത്.