തിരുവനന്തപുരം: ഈവര്‍ഷത്തെ എസ്.എസ്.എല്‍.സി പരീക്ഷാ സമയത്തില്‍ മാറ്റംവരുത്താന്‍ വിദ്യാഭ്യാസ വകുപ്പ് ഒരുങ്ങുന്നു. മുന്‍ വര്‍ഷങ്ങളില്‍ ഉച്ചക്കുശേഷം നടത്തിയിരുന്ന പരീക്ഷ ഈവര്‍ഷം മുതല്‍ ഹയര്‍ സെക്കന്‍ഡറി പരീക്ഷക്കൊപ്പം രാവിലെ നടത്താനാണ് ആലോചന. പരീക്ഷണാടിസ്ഥാനത്തില്‍ പത്ത്, പ്ലസ് വണ്‍, പ്ലസ് ടു അര്‍ധവാര്‍ഷിക പരീക്ഷകള്‍ ഒരുമിച്ച് നടത്തും.
ഇതിലൂടെ പരീക്ഷാ നടത്തിപ്പില്‍ അധ്യാപകര്‍ക്കും വിദ്യാര്‍ഥികള്‍ക്കുമുണ്ടാകാവുന്ന ആശയക്കുഴപ്പം പരിഹരിക്കാനാവുമെന്നാണ് കരുതുന്നത്. ഇതില്‍ പ്രായോഗിക ബുദ്ധിമുട്ടില്ലെന്നു കണ്ടാല്‍ മാര്‍ച്ചിലെ എസ്.എസ്.എല്‍.സി പരീക്ഷ രാവിലെയാക്കും.
വാര്‍ഷിക പരീക്ഷകളുടെ മോഡല്‍ പരീക്ഷകളും ഒന്നിച്ചാക്കും. ക്രിസ്മസ് പരീക്ഷക്കുശേഷം അന്തിമ തീരുമാനം കൈക്കൊള്ളുമെന്ന് മന്ത്രി സി. രവീന്ദ്രനാഥ് വ്യക്തമാക്കി. മാര്‍ച്ചിലെ കടുത്ത ചൂടില്‍ ഉച്ചക്കുശേഷമുള്ള പരീക്ഷ വിദ്യാര്‍ഥികളെ ഏറെ ബുദ്ധിമുട്ടിക്കുന്നെന്നും പരീക്ഷ രാവിലെ നടത്തണമെന്നും ക്യൂ.ഐ.പി യോഗം സര്‍ക്കാരിന് ശുപാര്‍ശ നല്‍കിയിരുന്നു.