ഇരിട്ടി: ഉളിക്കല്‍ മേഖലയില്‍ രണ്ടുപേര്‍ക്ക് പേപ്പട്ടിയുടെ കടിയേറ്റു. ഇന്നലെ രാവിലെയാണ് സംഭവം. ഉളിക്കല്‍ ടൗണിനടുത്ത് താമസിക്കുന്ന കോയിക്കല്‍ ചാണ്ടി (78), വയത്തൂര്‍ തൈപറമ്പില്‍ പാപ്പച്ചന്‍ (70) എന്നിവര്‍ക്കാണ് കടിയേറ്റത്. ഇവരെ തലശ്ശേരി ജനറല്‍ ആശുപത്രിയില്‍ പ്രവേശിപ്പിച്ചു.
വീടിന് സമീപത്തെ കടയിലേക്ക് നടന്നുപോവുന്നതിനിടെയാണ് ചാണ്ടിക്ക് കടിയേറ്റത്. വയത്തൂര്‍ ഹൈസ്‌കൂള്‍ ജങ്ഷനില്‍വച്ചാണ് പാപ്പച്ചനെ പേപ്പട്ടി ആക്രമിച്ചത്. കഴിഞ്ഞ മാസം നുച്ചിയാട് നെല്ലൂരില്‍ പേപ്പട്ടി കടിച്ച് വഴിയാത്രക്കാരന് പരുക്കേറ്റിരുന്നു. കോക്കാട്, പൊയ്യൂര്‍കരി, കോടാപറമ്പ്, തേര്‍മല തുടങ്ങി ഉളിക്കല്‍ പഞ്ചായത്തിലെ വിവിധ പ്രദേശങ്ങളില്‍ നിരവധി വളര്‍ത്തുമൃഗങ്ങളെ ആഴ്ചകള്‍ക്ക് മുന്‍പ് തെരുവുനായ്ക്കള്‍ ആക്രമിച്ചു പരുക്കേല്‍പ്പിച്ചിരുന്നു.
പേപ്പട്ടിശല്യം കൂടി വരുന്നതിനാല്‍ നടപടി സ്വീകരിക്കണമെന്നാവശ്യപ്പെട്ട് ഉളിക്കല്‍ പൊലിസ് കഴിഞ്ഞ ദിവസം പഞ്ചായത്ത് അധികൃതര്‍ക്ക് രേഖാമൂലം നോട്ടിസ് നല്‍കിയിരുന്നു. എന്നാല്‍ ഉളിക്കല്‍ പഞ്ചായത്തിന്റെ ഭാഗത്തുനിന്ന് യാതൊരു നടപടിയും ഉണ്ടായിട്ടില്ലെന്ന് നാട്ടുകാര്‍ പറയുന്നു.