ശാസ്താംകോട്ട: പാചകം ചെയ്യുന്നതിനിടെ ഗ്യാസ് സിലിണ്ടര്‍ കത്തിയെങ്കിലും അപകടം ഒഴിവായി. പോരുവഴി അമ്പലത്തുഭാഗം പ്ലാവിളവീട്ടില്‍ രാമചന്ദ്രന്‍പിള്ളയുടെ വീട്ടിലാണ് ഗ്യാസ് സിലിണ്ടര്‍ കത്തിയത്.
ഇന്നലെ രാവിലെ പുതിയതായി നിറച്ചുവച്ചിരുന്ന സിലിണ്ടര്‍ രാമചന്ദ്രന്‍പിള്ളയുടെ ഭാര്യ ശാന്തമ്മ അടുപ്പില്‍ ഘടിപ്പിച്ച ശേഷം പാചകം ചെയ്യുന്നതിനിടെ സിലിണ്ടറില്‍ ചോര്‍ച്ചയുണ്ടായി കത്തുകയായിരുന്നു.
ഇവരുടെ നിലവിളികേട്ട് ഓടിക്കൂടിയ നാട്ടുകാരിലൊരാള്‍ ഗ്യാസ് അടുപ്പും സിലിണ്ടറുമായി ബന്ധിപ്പിച്ചിരുന്ന ട്യൂബ് ഊരിമാറ്റി കത്താന്‍ തുടങ്ങിയ സിലിണ്ടര്‍ വലിച്ച് പുറത്തേക്ക് എറിഞ്ഞു. ശാസ്താംകോട്ട ഫയര്‍ഫോഴ്‌സില്‍ വിവരമറിയിച്ചതിനെ തുടര്‍ന്ന് ഫയര്‍ഫോഴ്‌സ് സ്ഥലത്തെത്തി സിലിണ്ടര്‍ വെള്ളമൊഴിച്ച് തണുപ്പിച്ച് തീ നിയന്ത്രണ വിധേയമാക്കുകയായിരുന്നു.
സിലിണ്ടര്‍ റെഗുലേറ്ററുമായി ഘടിപ്പിക്കുന്ന ഭാഗത്ത് വാഷര്‍ ഇല്ലാതിരുന്നതുകാരണമാണ് ഗ്യാസ് ചോര്‍ച്ചയുണ്ടായതും കത്താന്‍ ഇടയായതും. സമയോചിത ഇടപെടലിലാണ് വന്‍ദുരന്തം ഒഴിവായത്.