പൂച്ചാക്കല്‍: അരൂക്കുറ്റി ഗവ.സ്‌കൂളില്‍ സാമൂഹികവിരുദ്ധരുടെ ശല്യം വര്‍ധിച്ചുവരുന്നു. കുടിവെള്ള പൈപ്പുകള്‍ അടിച്ചുതകര്‍ക്കുകയും ക്ലാസ് മുറികളില്‍ അശ്ലീല ചിത്രങ്ങള്‍ വരയ്ക്കുകയും ചെയുന്നത് പതിവായി മാറി. കൂടാതെ ക്ലാസ് മുറികളില്‍ മലമൂത്ര വിസര്‍ജനം നടത്തുകയും മദ്യപാനവും സ്ഥിരമാണ്. രാത്രി കാലങ്ങളില്‍ മതില്‍ചാടി കടന്നാണ് സ്‌കൂളില്‍ പ്രവേശിക്കുന്നത്. കുടിവെള്ള പൈപ്പുകള്‍ തകര്‍ത്തതോടെ സ്‌കൂളില്‍ വെള്ളം ലഭ്യമല്ലാതായി.
പലതവണ പൈപ്പ് നന്നാക്കിയെങ്കിലും രാത്രി സ്‌കൂളില്‍ എത്തുന്ന സംഘം പൈപ്പുകള്‍ അടിച്ചു തകര്‍ക്കും. പ്രദേശത്തുള്ളവര്‍ തന്നെയാണ് സ്‌കൂളില്‍ കയറുന്നതെന്നാണ് നാട്ടുകാര്‍ പറയുന്നത്. രാവിലെ സ്‌കൂളില്‍ എത്തുന്ന അധ്യാപകരാണ് ക്ലാസ് റൂമിലെ അശ്ലീല ചിത്രങ്ങളും മലമൂത്രവുമെല്ലാം നീക്കം ചെയുന്നത്. ഇത് അധ്യാപകരെ വലിയ ബുദ്ധിമുട്ടിലാക്കിയിരിക്കുകയാണ്. സ്‌കൂള്‍ ഗ്രൗണ്ടില്‍ നിന്ന് സ്ഥിരമായി മദ്യക്കുപ്പികളും ലഭിക്കുന്നുണ്ട്. പൊലിസ് രാത്രികാല പരിശോധന ശക്തമാക്കണമെന്ന് സ്‌കൂള്‍ അധികൃതരും നാട്ടുകാരും ആവശ്യപ്പെട്ടു.