പേരാമ്പ്ര: പെരുവണ്ണാമൂഴി ചെമ്പനോട റോഡില്‍ പന്നിക്കോട്ടൂര്‍ വനഭാഗത്ത് അറവു മാലിന്യം തള്ളാനെത്തിയയാളെ പെരുവണ്ണാമൂഴി ഫോറസ്റ്റ് റെയ്ഞ്ചര്‍ ബി.ആര്‍ റൂബിന്റെ നേതൃത്വത്തില്‍ വനപാലകര്‍ പിടികൂടി.
പന്തിരിക്കര സൂപ്പിക്കട സ്വദേശി പാറച്ചുവട്ടില്‍ ആഫിദാ(27)ണ് അറവു മാലിന്യം കൊണ്ടുവന്ന വാഹനമടക്കം ഇന്നലെ പുലര്‍ച്ചെ അഞ്ചോടെ വനപാലകരുടെ കയ്യിലകപ്പെട്ടത്. അറസ്റ്റു ചെയ്ത പ്രതിയെ കൊയിലാണ്ടി മജിസ്‌ട്രേറ്റ് കോടതിയില്‍ ഹാജരാക്കി 14 ദിവസത്തേക്ക് റിമാന്‍ഡ് ചെയ്തു.
ഫോറസ്റ്റ് ഉദ്യോഗസ്ഥരായ കെ. ഷാജു, പി. രമേശന്‍, കെ.പി ലത്തീഫ്, പി. ബഷീര്‍, ഇ.കെ ശ്രീലേഷ്‌കുമാര്‍, പി.കെ ചന്ദ്രന്‍ എന്നിവര്‍ ചേര്‍ന്നാണ് പ്രതിയെ പിടികൂടിയത്.
കുറെക്കാലമായി മേഖലയില്‍ മാലിന്യം തള്ളുന്നവരെ പിടികൂടാന്‍ വനപാലകര്‍ ഉറക്കമിളച്ചു കാവലിരിക്കുന്നതിനിടെയാണ് തൊണ്ടി സഹിതം പിടിയിലായത്.