ന്യൂഡല്‍ഹി: മധ്യപ്രദേശ് കോണ്‍ഗ്രസിലെ തമ്മിലടി പരിഹരിക്കാനായി മുതിര്‍ന്ന നേതാവ് എ.കെ ആന്റണിയുടെ നേതൃത്വത്തിലുള്ള സമിതിയെ പാര്‍ട്ടി അധ്യക്ഷ സോണിയ ഗാന്ധി ചുമതലപ്പെടുത്തി. മധ്യപ്രദേശ് മുഖ്യമന്ത്രി കമല്‍നാഥുമായി നടത്തിയ ചര്‍ച്ചക്ക് ശേഷമായിരുന്നു സോണിയയുടെ തീരുമാനം.
കഴിഞ്ഞവര്‍ഷം സംസ്ഥാനത്ത് നടന്ന തെരഞ്ഞെടുപ്പില്‍ അധികാരത്തിലെത്തിയ കോണ്‍ഗ്രസില്‍ മുഖ്യമന്ത്രിപദവിക്കായി ചരടുവലിച്ച നേതാക്കളായിരുന്നു കമല്‍നാഥും യുവമുഖമായ ജ്യോതിരാദിത്യ സിന്ധ്യയും. കമല്‍നാഥിന് മുഖ്യമന്ത്രി പദലി ലഭിച്ചതിനാല്‍ സിന്ധ്യയെ സംസ്ഥാന അധ്യക്ഷനാക്കണമെന്ന് ആവശ്യപ്പെട്ട് ഒരുവിഭാഗം പ്രവര്‍ത്തകര്‍ പരസ്യമായി രംഗത്തെത്തിയതാണ് ഇപ്പോഴത്തെ പ്രശ്‌നങ്ങളുടെ തുടക്കം. സിന്ധ്യയെ പിന്തുണച്ച് സംസ്ഥാനത്തിന്റെ വിവിധ ഭാഗങ്ങളില്‍ പോസ്റ്ററുകളും ഫ്‌ളക്‌സുകളും പ്രത്യക്ഷപ്പെട്ടതോടെ തര്‍ക്കം രൂക്ഷമാവുകയും ചെയ്തു. മന്ത്രിസഭയിലെ ചിലരും സിന്ധ്യക്കൊപ്പം നിന്നതാണ് കമല്‍നാഥിനും കേന്ദ്രനേതൃത്വത്തിനും ഒരുപോലെ തലവേദനയായത്.
അതേസമയം, ഇന്നലെ കമല്‍നാഥുമായി നടത്തിയ ചര്‍ച്ചയില്‍ സംസ്ഥാനത്തെ പ്രശ്‌നങ്ങളില്‍ സോണിയ ആശങ്ക പ്രകടിപ്പിച്ചു. പ്രശ്‌നം ആന്റണിയുടെ നേതൃത്വത്തിലുള്ള കോണ്‍ഗ്രസ് അച്ചടക്ക സമിതിക്ക് കൈമാറിയതായി യോഗശേഷം കമല്‍നാഥ് അറിയിച്ചു.