അധ്യാപകനെ പൊലിസ് അറസ്റ്റു ചെയ്തു. തീയിട്ടതിനെ തുടര്‍ന്ന് രണ്ട് ക്ലാസ് മുറികള്‍ കത്തിനശിച്ചു

ലാഹോര്‍: അധ്യാപകന്റെ മര്‍ദനത്തില്‍ വിദ്യാര്‍ഥി മരിച്ചതില്‍ പ്രതിഷേധിച്ച് സഹപാഠികള്‍ സ്‌കൂളിന് തീയിട്ടു. പാകിസ്ഥാനിലെ ലാഹോറില്‍ ശനിയാഴ്ചയായിരുന്നു സംഭവം. പത്താം ക്ലാസ് വിദ്യാര്‍ഥി ഹഫീസ് ബിലാലാണ് മരിച്ചത്. ലാഹോറിലെ അമേരിക്കന്‍ ലൈസ്ടഫ് സ്‌കൂളിലെ വിദ്യാര്‍ഥിയാണ് ബിലാല്‍. പാഠഭാഗങ്ങള്‍ മനഃപാഠമാക്കാത്തതിന് അധ്യാപകന്‍ കമ്രാനാണ് വിദ്യാര്‍ഥിയെ മര്‍ദിച്ചതെന്ന് പാക് മാധ്യമങ്ങള്‍ റിപോര്‍ട്ട് ചെയ്തു.
അധ്യാപകന്‍ വിദ്യാര്‍ഥിയെ ക്രൂരമായി മര്‍ദിക്കുകയായിരുന്നെന്നാണ് സഹപാഠികളും ബന്ധുക്കളും പറയുന്നത്. വിദ്യാര്‍ഥിയുടെ വയറില്‍ അധ്യാപകന്‍ ചവിട്ടുകയും തല ചുമരില്‍ ഇടിക്കുകയും ചെയ്തു.
അധ്യാപകനെ പൊലിസ് അറസ്റ്റു ചെയ്തു. സംഭവത്തില്‍ പ്രതിഷേധിച്ച് വിദ്യാര്‍ഥികള്‍ സ്‌കൂളിന് തീയിട്ടു. രണ്ട് ക്ലാസ് മുറികള്‍ കത്തിനശിച്ചു. സ്‌കൂളിന് തീയിട്ട സംഭവത്തില്‍ ഏതാനും വിദ്യാര്‍ഥികളെയും പൊലിസ് കസ്റ്റഡിയിലെടുത്തിട്ടുണ്ട്.