അമ്പലപ്പുഴ: പുന്നപ്ര തെക്ക് പഞ്ചായത്ത് ഒന്‍പതാം വാര്‍ഡില്‍ പഴയ നടക്കാവ് റോഡില്‍ പാര്‍വ്വതി പ്രസിന് സമീപമാണ് ലക്ഷങ്ങള്‍ പാഴാക്കിയുള്ള കലുങ്ക് നിര്‍മാണം. സമീപത്തെ പ്രസ് റോഡിലൂടെ സ്ഥാപിച്ചിരിക്കുന്ന 100 മീറ്ററോളം ദൈര്‍ഘ്യവും ഒന്നര അടി ആഴത്തിലും ഒന്നര മീറ്റര്‍വീതിയുമുള്ള കാനയിലെ വെള്ളം മറുവശത്തെ വേലിക്കകം റോഡിന് സമീപത്തുകൂടി കടന്ന് പോകുന്ന കാനയിലേക്ക് വെള്ളമൊഴുക്കാനാണ് ലക്ഷങ്ങള്‍ പാഴാക്കി കൂറ്റന്‍ കലുങ്ക് പണിയുന്നത്.
ഒന്നര അടി ആഴവും ഒന്നര അടി വീതിയുമുള്ള കാനയില്‍ നിന്നും മഴക്കാലമാകുമ്പോള്‍ റോഡ് കവിഞ്ഞ് വെള്ളം ഒഴുകുന്നത് പതിവ് കാഴ്ച്ചയാണ്. കലുങ്ക് നിര്‍മിച്ച് വെള്ളം ഒഴുക്കാമെന്നത് അതിമോഹവും. സാധാരണ പൈപ്പ് സ്ഥാപിച്ച് വെള്ളം സുഗമമായി ഒഴുക്കി വിടാവുന്ന സാഹചര്യമുള്ളപ്പോഴാണ് ലക്ഷങ്ങള്‍ പാഴാക്കി കലുങ്ക് പണിക്ക് അധികൃതര്‍ ഒരുങ്ങുന്നത്. 2015-16 ജനകീയ ആസൂത്രപദ്ധതി പ്രകാരം 207 മീറ്റര്‍ ദൈര്‍ഘ്യത്തില്‍ പുനര്‍ നിര്‍മിച്ചതാണ് ശ്രീദേവി ,പാര്‍വ്വതി പ്രസ് റോഡ്. ഈ റോഡിനോടൊപ്പമാണ് 100 മീറ്ററോളം ദൈര്‍ഘ്യത്തില്‍ കാനയും നിര്‍മിച്ചത് . ഇപ്പോള്‍ ഈ കാനയില്‍ മണ്ണും ചെളിയും നിറഞ്ഞ് ഒഴുക്ക് നിലച്ചിരിക്കുകയാണ്. ഒന്‍പതാം വാര്‍ഡില്‍ മാര്‍ക്കറ്റ് ഹാഫിയത്ത് റോഡ് ഒന്നര വര്‍ഷം മുന്‍പ് 150 മീറ്ററോളം പുനരുദ്ധരിച്ചതാണ്. എന്നാല്‍ മൂന്ന് മാസം പിന്നിട്ടപ്പോള്‍ റോഡ് തോടായി മാറുകയായിരുന്നു.
ഈ വാര്‍ഡില്‍ തന്നെ കളിത്തട്ട് വെട്ടിക്കരി റോഡ് ര്ണ്ട് ലക്ഷം രൂപ ചിലവില്‍ 100 മീറ്ററോളം ഒരു വര്‍ഷത്തിന് മുന്‍പ് പുനരുദ്ധരിച്ചെലും ആറ് മാസം കഴിഞ്ഞപ്പോള്‍ ഈ റോഡും പൊട്ടിപൊളിഞ്ഞ് സഞ്ചാരയോഗ്യമല്ലാതായി. കരാറുകാരും ഉദ്യോഗസ്ഥരും തമ്മിലുള്ള ഒത്തുകളിയാണെന്ന ആക്ഷേപം നേരത്തെ ഉയര്‍ന്നിരുന്നു. ഇപ്പോള്‍ നടക്കുന്ന കലുങ്ക് നിര്‍മാണവും ഇതിന്റെ പിന്നിലുള്ള അഴിമതിയും വിജിലന്‍സ് അന്വേഷിക്കണമെന്നാണ് നാട്ടുക്കാരുടെ ആവശ്യം.