ചാവക്കാട്: ഒരുമനയൂരില്‍ വീട്ടില്‍ നിന്നും 22 പവന്‍ ആഭരണങ്ങള്‍ നഷ്ടപ്പെട്ടു. ഒരുമനയൂര്‍ കരുവാരക്കുണ്ട് രായംമരക്കാര്‍ വീട്ടില്‍ അലിക്കുട്ടിയുടെ വീട്ടില്‍ നിന്നാണ് സ്വര്‍ണാഭരണങ്ങള്‍ മോഷണം പോയത്. വീടിന്റെ മുന്‍വശത്തെ വാതില്‍ കുത്തിപ്പൊളിച്ചാണ് മോഷ്ടാക്കള്‍ അകത്തു കടന്നിട്ടുള്ളത്. കഴിഞ്ഞ ദിവസം വീട്ടുകാര്‍ അലിക്കുട്ടിയുടെ മകനേയും മരുമകളേയും വിളിക്കാന്‍ എയര്‍പ്പോര്‍ട്ടിലേക്ക് പോയിരുന്നു.
പുലര്‍ച്ചെ വീട്ടുകാര്‍ തിരിച്ചെത്തിയപ്പോഴാണ് മോഷണ വിവരം അറിഞ്ഞത്. വീടിന്റെ മുന്‍വശത്തെ വാതിലും അകത്ത് കടന്നപ്പോള്‍ മറ്റു വാതിലുകളും തുറന്നിട്ട നിലയിലായിരുന്നു. അലമാരയില്‍ സൂക്ഷിച്ചിരുന്ന മാല, വള, ലോക്കറ്റുകള്‍, മോതിരം എന്നിവയാണ് കവര്‍ന്നത്. കുന്നംകുളം ഡി.വൈ.എസ്.പി ഫേമസ് വര്‍ഗീസ്, ചാവക്കാട് സി.ഐ.കെ.ജി  സുരേഷ്, എസ്.ഐ എം.കെ രമേഷ് എന്നിവരുടെ നേതൃത്വത്തില്‍ പൊലിസും വിരലടയാള വിദഗ്ധരും സ്ഥലത്തെത്തി തെളിവെടുത്തു.