ആലുവ: സര്‍ക്കാര്‍ ജീവനക്കാര്‍ താമസിക്കുന്ന ആലുവ തോട്ടക്കാട്ടുകര പി.ഡബ്ല്യു.ഡി ക്വാര്‍ട്ടേഴ്‌സിലെ വീടിന് മുകളിലേക്ക് കൂറ്റന്‍ മരം വീണ് തകര്‍ന്നു.
കൊങ്ങോര്‍പ്പിള്ളി ഹയര്‍ സെക്കന്‍ഡറി സ്‌കൂളിലെ അധ്യാപികയായ നജീറ താമസിക്കുന്ന വീടിന് മുകളിലാണ് ഇന്നലെ മരം വീണത്. ഈ സമയം ഇവരുടെ മക്കളായ ആദില്‍ അലി, ഹുദ ഫാത്തിമ എന്നിവര്‍ വീട്ടിലുണ്ടായിരുന്നെങ്കിലും ശബ്ദം കേട്ടതോടെ ഇവര്‍ ഓടി രക്ഷപ്പെടുകയായിരുന്നു. അറുപത്തി അഞ്ചോളം വീടുകളാണ് ഇവിടെയുള്ളത് ക്വോര്‍ട്ടേഴ്‌സ് വളപ്പില്‍ ഏതു സമയത്തും വീഴാറായി നില്‍ക്കുന്ന നിരവധി കൂറ്റന്‍ മരങ്ങള്‍ നിലനില്‍ക്കുന്നുണ്ട്. അറുപത് വര്‍ഷത്തിലേറെയായുള്ള ക്വാര്‍ട്ടേഴ്‌സില്‍ അപകടാവസ്ഥയിലായ മരങ്ങള്‍ താമസക്കാരുടെ പേടിസ്വപനമായിരിക്കുകയാണ്. ഈ മരങ്ങള്‍ വെട്ടിമാറ്റാന്‍ പലവട്ടം ആവശ്യപ്പെട്ടെങ്കിലും ഫോറസ്റ്റ് അധികൃതര്‍ തയാറായിട്ടില്ലെന്നാണ് താമസക്കാരുടെ പരാതി.