തിരുവനന്തപുരം: ഓണക്കാലത്ത് എക്‌സൈസ് വകുപ്പ് നടത്തിയ പരിശോധനയില്‍ അനധികൃത മദ്യവില്‍പനയ്ക്ക് 1,214 പേര്‍ അറസ്റ്റില്‍. ഓപ്പറേഷന്‍ വിശുദ്ധി എന്ന് പേരിട്ടിരുന്ന പരിശോധനയില്‍ 1,482 കേസുകളെടുത്തു. 220 കിലോ കഞ്ചാവും 98,62,950 രൂപയുടെ കള്ളപ്പണവുംപിടിച്ചെടുത്തു. ഓഗസ്റ്റ് 10 മുതല്‍ സെപ്റ്റംബര്‍ 12 വരെയുള്ള ഓപറേഷന്‍ വിശുദ്ധിയുടെ കണക്കുകളാണ് എക്‌സൈസ് വകുപ്പ് പുറത്തുവിട്ടത്.
സിന്തറ്റിക് മയക്കുമരുന്നുകളായ ഹാഷിഷ്, ബ്രൗണ്‍ ഷുഗര്‍, എല്‍.എസ്.ഡി, കൊക്കയിന്‍ തുടങ്ങിയവ വ്യാപകമായി കണ്ടെത്തി. പെന്റാസൊസൈനും, ട്രമഡോളും പോലെയുള്ള നാര്‍ക്കോട്ടിക് ഡ്രഗ്‌സുകളും പരിശോധനയില്‍ പിടിച്ചെടുത്തിട്ടുണ്ട്. കേരളത്തില്‍ വില്‍പന നിരോധിച്ച പുകയില ഉല്‍പന്നങ്ങളുടെ വിതരണം സംസ്ഥാനത്തു വര്‍ധിച്ചുവെന്നും ഓപ്പറേഷന്‍ വിശുദ്ധിയില്‍ കണ്ടെത്തി. കൂടാതെ കേരള, തമിഴ്‌നാട് അതിര്‍ത്തിയിലൂടെ അനധികൃതമായി കടത്തുന്ന കുഴല്‍പ്പണവും മയക്കുമരുന്നുകളും തട്ടിയെടുക്കാന്‍ പ്രത്യേക ക്വട്ടേഷന്‍ സംഘങ്ങള്‍ പ്രവര്‍ത്തിക്കുന്നുണ്ടെന്നും എക്‌സൈസ് പരിശോധനയില്‍ കണ്ടെത്തി. എക്‌സൈസ് വകുപ്പിന്റെ നേതൃത്വത്തില്‍ പ്രത്യേക സ്‌ക്വാഡുകളായി തിരിഞ്ഞായിരുന്നു സംസ്ഥാന വ്യാപകമായി പരിശോധന നടത്തിയത്.