മെല്‍ബണ്‍: അന്താരാഷ്ട്ര സൗഹൃദ പോരാട്ടങ്ങളില്‍ വമ്പന്‍മാരായ ബ്രസീലിനും അര്‍ജന്റീനയ്ക്കും തകര്‍പ്പന്‍ ജയം. ബ്രസീല്‍ എതിരില്ലാത്ത നാലു ഗോളിന് ആസ്‌ത്രേലിയയെയും അര്‍ജന്റീന എതിരില്ലാത്ത ആറു ഗോളിന് സിംഗപ്പൂരിനെയും തകര്‍ത്തു.
അര്‍ജന്റീനയ്‌ക്കെതിരേ പരാജയപ്പെട്ടതിന്റെ ക്ഷീണം തീര്‍ക്കാനാണ് ബ്രസീല്‍ കളത്തിലിറങ്ങിയത്. അക്ഷരാര്‍ഥത്തില്‍ അവരത് കളത്തില്‍ നടപ്പിലാക്കുകയും ചെയ്തു. ആദ്യ മിനുട്ടില്‍ തന്നെ ഡീഗോ സോസയിലൂടെ ബ്രസീല്‍ അക്കൗണ്ട് തുറന്നു. താരത്തിന്റെ ആദ്യ അന്താരാഷ്ട്ര ഗോളായിരുന്നു ഇത്. ആദ്യ പകുതി ഈ ഗോളിന്റെ മുന്‍തൂക്കത്തില്‍ ബ്രസീല്‍ അവസാനിപ്പിക്കുകയും ചെയ്തു.
രണ്ടാം പകുതിയില്‍ തിയാഗോ സില്‍വ 62ാം മിനുട്ടില്‍ ടീമിന്റെ ലീഡ് ഉയര്‍ത്തി. 75ാം മിനുട്ടില്‍ ടൈസണ്‍ ടീമിന്റെ മൂന്നാം ഗോള്‍ സ്വന്തമാക്കി. കളിയുടെ അധിക സമയത്ത് സോസ തന്റെ രണ്ടാം ഗോള്‍ നേടി പട്ടിക പൂര്‍ത്തിയാക്കി.
സിംഗപ്പൂരിനെതിരേ ഫെഡെറിക്കോ ജൂലിയന്‍ ഫാസിയോ, ജീസസ് കൊറിയ, അലക്‌സാന്‍ഡ്രോ ഗോമസ്, ലിയാന്‍ഡ്രോ പരേഡസ്, ലൂക്കാസ് അലാറിയോ, എയ്ഞ്ചല്‍ ഡി മരിയ എന്നിവരാണ് അര്‍ജന്റീനയ്ക്കായി സ്‌കോര്‍ ചെയ്തത്. പ്രമുഖ താരങ്ങളെ പുറത്തിരുത്തിയ സാംപോളി മുതിര്‍ന്ന താരമായി ഡി മരിയയെ മാത്രമാണ് ടീമിലുള്‍പ്പെടുത്തിയത്. മത്സരത്തിലെ അരങ്ങേറ്റം അലക്‌സാന്‍ഡ്രോ ഗോമസ് ഗോള്‍ നേടി ഗംഭീരമാക്കുകയും ചെയ്തു.25ാം മിനുട്ടില്‍ അക്കൗണ്ട് തുറന്ന അര്‍ജന്റീനയ്ക്ക് പിന്നീട് തിരിഞ്ഞു നോക്കേണ്ടി വന്നില്ല.