എരുമപ്പെട്ടി: പത്താം ക്ലാസ് വിജയിക്കാനായെങ്കിലും പാതി വഴിയില്‍ പഠനം മുടങ്ങിയ ചിറമനേങ്ങാട് സ്വദേശി സഹല്‍ മുഹമ്മദിന് ഇനി പഠനം തുടരാം. ര@ണ്ട് വര്‍ഷം മുന്‍പ് പിതാവ് മരണപ്പെട്ട സഹല്‍ സാമ്പത്തിക പ്രതിസന്ധി രൂക്ഷമായതോടെ പെട്രോള്‍ പമ്പിലെ ജോലി തിരഞ്ഞെടുക്കുകയായിരുന്നു. പഠനത്തില്‍ മിടുക്കനായ വിദ്യാര്‍ഥി സാമ്പത്തിക പ്രതിസന്ധി കാരണം പഠനം ഉപേക്ഷിച്ച കഥ കേട്ടറിഞ്ഞ കുന്നംകുളം സി.ഐ രാജേഷ് കെ മേനോന്‍ സഹലിന്റെ ഒരു വര്‍ഷത്തെ പഠന ചിലവ് ഏറ്റെടുക്കുകയായിരുന്നു. എരുമപ്പെട്ടി പൊലിസ് സ്റ്റേഷനില്‍ നടന്ന ചടങ്ങില്‍ സി.ഐ രാജേഷ് കെ മേനോന്‍ സഹലിന് നാല്‍പതിനായിരം രൂപയുടെ ചെക്ക് കൈമാറി. എരുമപ്പെട്ടി എസ്.ഐ മനോജ് കെ ഗോപി എരുമപ്പെട്ടി പ്രസ്സ് ക്ലബ്ബ് പ്രസിഡണ്ട് കബീര്‍ കടങ്ങോട്, മാധ്യമ പ്രവര്‍ത്തകന്‍ റഷീദ് എരുമപ്പെട്ടി സംബന്ധിച്ചു.