പരപ്പനങ്ങാടി: ഇന്നലെ അര്‍ധരാത്രി മുതല്‍ ട്രോളിങ് നിരോധം നിലവില്‍ വന്നതോടെ ആഴക്കടലിലെ നോമ്പുതുറയും അവസാനിച്ചു.ബോട്ട് മത്സ്യ ബന്ധനത്തിന് നീണ്ട ഒന്നര മാസ കാലയളവ് നിര്‍ബന്ധിത അവധിയാകുന്നതിനാല്‍ ശേഷിക്കുന്ന കടല്‍ നോമ്പുതുറ തീര്‍ത്തും പരിമിതിയിലൊതുങ്ങും. പ്രത്യാശയുടെ ഓളങ്ങള്‍ സമ്മാനിക്കുന്ന ആഴക്കടലിന് മീതെ അന്നം തേടിയിറങ്ങുന്ന മത്സ്യതൊഴിലാളികള്‍ക്ക് നോമ്പുകാലം അങ്ങേയറ്റം ആനന്ദകരമാണ്. ശാന്തമായ പ്രാര്‍ഥനയ്ക്കും ശാന്തി നുകരുന്ന നോമ്പു തുറയ്ക്കും സ്വന്തം കൈ കൊണ്ടുണ്ടാക്കിയ അത്താഴ ഭക്ഷണത്തിനും കടലോളം രുചിയുണ്ട്.
ബോട്ടുയാനങ്ങള്‍ക്ക് പുറമെ പരമ്പരാഗത മത്സ്യതൊഴിലാളി വിഭാഗത്തിലെ ' ഒഴുക്കല്‍' ചെറു വള്ളങ്ങളാണ് രാത്രിയില്‍ കടലില്‍ അന്തിയുറങ്ങി അന്നം തേടുന്നത്. രണ്ടോ മൂന്നോ മത്സ്യതൊഴിലാളികള്‍ മാത്രമാണ് ഒഴുക്കല്‍ വള്ളങ്ങളിലെ പണിക്കാര്‍. ഉച്ചയോടെ ളുഹ്‌റ് നമസ്‌കാരവും കഴിഞ്ഞ് പണിക്കിറങ്ങുന്ന ഒഴുക്കല്‍ വള്ളങ്ങളില്‍ നോമ്പുതുറക്കാവശ്യമായ വിഭവങ്ങളും അത്താഴവും മുത്താഴവും തയാറാക്കാനാവശ്യമായ മസാല കൂട്ടുകളും സ്റ്റൗ ഉള്‍പ്പടെയുള്ള സംവിധാനങ്ങളും തയാറാക്കി വെക്കും.സൂര്യാസ്തമയത്തിന്റെ നേര്‍കാഴ്ചയില്‍ നോമ്പു തുറക്കാനുള്ള സമയം കൃത്യമായി തൊട്ടറിയും.
തൊഴില്‍ രംഗത്തെ വലിപ്പ ചെറുപ്പങ്ങള്‍ നോക്കാതെ ഒന്നിച്ചിരുന്ന് പ്രാഥമിക നോമ്പുതുറ. പിന്നീട് പ്രാര്‍ഥന. അതിനിടയില്‍ മത്സ്യ ബന്ധനത്തിനായി വലയിളക്കം. ശേഷം വിശാലമായ നോമ്പുതുറ. അതിനിടെ സ്വന്തമാവശ്യത്തിനായി ചൂണ്ടറിയെറിഞ്ഞ് മീന്‍ പിടുത്തവും. പിടക്കുന്ന മത്സ്യം തോണിയിലാക്കി പറക്കുന്ന സ്റ്റൗവില്‍ വെന്തു മറയുന്നതിന് മുന്‍പെ ഇശാ നമസ്‌ക്കരവും പലരും തറാവീഹ് നമസ്‌ക്കാരവും പൂര്‍ത്തിയാക്കും. പിന്നീട് ചേര്‍ന്നൊഴുകുന്ന കരയുടെ വര്‍ത്തമാനം കടലില്‍ സജീവമാകുന്നു. ഇതിനിടെ മുത്താഴം തീര്‍ത്ത് കടലിലെ 'ആഴപ്പാട്;' (മത്സ്യം കിട്ടാനുള്ള സാധ്യത) നോക്കിയും പറഞ്ഞും ഒഴുക്കല്‍ വള്ളത്തിലെ ഒന്നോ രണ്ടോ പേര്‍ ഉറക്കത്തിലേക്കും ഒരാള്‍ കടല്‍ നിരീക്ഷണത്തിലേക്കും വഴിമാറും. മൊബൈലില്‍ കരുതി വെച്ച അലാറാം മുഴങ്ങുന്നതോടെ ഉറക്കമുണരാനും കരുതി വെച്ച ഭക്ഷണം വെച്ചുവിളമ്പാനും ധൃതി പൂണ്ട ആവേശം. ആകാശ ക്ലോക്ക് നോക്കി സുബഹ് ബാങ്കിന്റെ സമയമറിയാന്‍ പരമ്പരാഗത അറിവിന്റെ ശാസ്ത്ര ബോധമുണ്ടെങ്കിലും മൊബൈല്‍ ഫോണിലൂടെയുള്ള ബാങ്കൊലി കേള്‍ക്കേണ്ട താമസം അത്താഴത്തിന്റെ പങ്കുവെക്കലുകള്‍ക്ക് നങ്കൂരമിട്ട് സുബഹ് നമസ്‌ക്കാരത്തിന്റെയും ലഭ്യമായ മത്സ്യങ്ങളുമായുള്ള തിരിച്ച് വരവിന്റെയുമൊരുക്കം.
രാത്രിയുടെ കൂരിരുട്ടും പ്രതികൂല കാലാവസ്ഥയുടെ കാറ്റും കോളും അതിജീവിച്ച് കടലില്‍ അന്തിയുറങ്ങി അന്നം തേടിയിറങ്ങുന്ന ഈ സാഹസിക മത്സ്യ ബന്ധന രീതി തീരത്തെ ചുരുക്കം ചില സ്ഥലങ്ങളില്‍ മാത്രമെ നിലവിലൊള്ളൂ. ശീലിച്ചവര്‍ക്കാകട്ടെ ഇതിന്റെ രസവും ഹരവും ഒന്ന് വേറെ തന്നെയാണ്.