തൃശൂര്‍: മികച്ച സാമൂഹ്യ രാഷ്ട്രീയ സേവനപ്രവര്‍ത്തകനുള്ള ഡോ. കെ.കെ രാഹുലന്‍ സ്മാരക പുരസ്‌കാരം ഒ രാജഗോപാല്‍ എം.എല്‍.എയ്ക്ക്. പതിനായിരം രൂപയും ഫലകവും പ്രശസ്തി പത്രവും അടങ്ങുന്നതാണ് പുരസ്‌കാരം. 18ന് സാഹിത്യ അക്കാദമി ഹാളില്‍ മുന്‍ ഗവര്‍ണര്‍ കെ ശങ്കരനാരായണന്‍ അവാര്‍ഡ് സമ്മാനിക്കും. സഹൃദയവേദി പ്രസിഡന്റ് ഡോ. ഷൊര്‍ണൂര്‍ കാര്‍ത്തികേയന്‍ അധ്യക്ഷത വഹിക്കുന്ന ചടങ്ങില്‍ പി ചിത്രന്‍ നമ്പൂതിരിപ്പാട് പ്രശസ്തിപത്രം സമര്‍പ്പിക്കും. 

ഡോ. സി.കെ തോമസ് അനുസ്മരണപ്രഭാഷണം നടത്തും. രാവിലെ 9.45ന് നടക്കുന്ന തൃശൂരിന്റെ സാംസ്‌കാരികമുഖം എന്ന സിമ്പോസിയം മാര്‍ അപ്രേം ഉദ്ഘാടനം ചെയ്യും. മുന്‍ എം.എല്‍.എ. എം. കെ. പോള്‍സണ്‍ മോഡറേറ്ററാകും. ഉച്ചയ്ക്ക് 1.30ന് നടക്കുന്ന കവിയരങ്ങും പുസ്തക പ്രകാശനവും മേയര്‍ അജിതാ ജയരാജന്‍ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ഷീല വിജയകുമാര്‍ അധ്യക്ഷത വഹിക്കും. വാര്‍ത്താസമ്മേളനത്തില്‍ ഡോ. ഷൊര്‍ണൂര്‍ കാര്‍ത്തികേയന്‍, ബേബി മൂക്കന്‍, അഡ്വ. വി. എന്‍. നാരായണന്‍, പ്രൊഫ. വി. എ. വര്‍ഗീസ് പങ്കെടുത്തു.