നാദാപുരം: വര്‍ണവും, വെളിച്ചവും അന്യമായ മുഹമ്മദിന്റെ സ്വപ്നങ്ങള്‍ക്ക് നിറവും വെളിച്ചവുമാവുകയാണ് ഉറ്റതോഴനായ സായന്ത്.
രണ്ടുപേരും നാദാപുരം ഗവ.യു.പി സ്‌കൂളിലെ ഏഴാംക്ലാസ് വിദ്യാര്‍ഥികളാണ്. ജന്മനാകാഴ്ചയില്ലാത്ത മുഹമ്മദിന് എന്തിനും സായന്ത് വേണം. മുഹമ്മദിന്റെ വരവുംകാത്ത് രാവിലെത്തന്നെ സ്‌കൂള്‍ ഗെയിറ്റില്‍ സായന്ത് കാത്തിരിപ്പുണ്ടാകും.
പഠനത്തിനൊപ്പം പാട്ടിലും മിടുക്കനാണ് മുഹമ്മദ്. സ്‌കൂളിലെ മുഴുവന്‍ അധ്യാപകരേയും ശബ്ദംകൊണ്ടാണ് അവന്‍ തിരിച്ചറിയുന്നത്.
സ്‌കൂളിലെ മുഴുവന്‍ കുട്ടികള്‍ക്കും പ്രിയങ്കരനായ മുഹമ്മദിന് സായന്ത് ഒരു കൂട്ടുകാരന്‍ എന്നതിലുപരി ഒരു രക്ഷിതാവ് കൂടിയാണ്. ശാരീരിക, മാനസിക വെല്ലുവിളികള്‍ നേരിടുന്ന പതിനഞ്ചോളം കുട്ടികള്‍ ഇവിടെ പഠിക്കുന്നുണ്ട്.
അവര്‍ക്കാവശ്യമായ എല്ലാ സഹായങ്ങളും ചെയ്തു കൊടുക്കുന്നത് സഹപാഠികള്‍ തന്നെയാണ് . ഇത് ഈ സര്‍ക്കാര്‍ വിദ്യാലയത്തെ മറ്റുള്ളവയില്‍ നിന്ന് വ്യത്യസ്തമാക്കുന്നു.