കുറ്റ്യാടി: 'ലഹരിയാക്കാം വായന, കൂടെ വരൂ ഞങ്ങള്‍ക്കൊപ്പം' സന്ദേശവുമായി ദേവര്‍കോവില്‍ കെ.വി.കെ.എം.എം യു.പി സ്‌കൂള്‍ ഈ മാസം 10ന് സംഘടിപ്പിക്കുന്ന ലൈബ്രറി പുസ്തകങ്ങള്‍ തേടിയുള്ള 'പുസ്തക വണ്ടി' യാത്രയുടെ മുന്നോടിയായി ഗൃഹാങ്കണ പി.ടി.എകള്‍ സജീവമാകുന്നു.
വിവിധ പ്രദേശങ്ങള്‍ കേന്ദ്രീകരിച്ച് രക്ഷിതാക്കളാണ് പുസ്തക വണ്ടിയുടെ വിജയത്തിനായി ഗൃഹാങ്കണ സംഗമങ്ങള്‍ നടത്തുന്നത്. ക്ലാസുകളില്‍ വായനാ വസന്തം തീര്‍ക്കുന്നതിന് തയാറാവുന്ന ക്ലാസ് ലൈബ്രറികളിലേക്ക് പുസ്തകങ്ങള്‍ തേടിയുള്ള കുട്ടികളുടെ യാത്രയ്ക്ക് ഇതിനോടകം വലിയ ജനപിന്തുണയാണ് ലഭിച്ചുകൊണ്ടിരിക്കുന്നത്.
ഈ മാസം 10ന് രാവിലെ തൊട്ടില്‍പ്പാലത്ത് നിന്നാരംഭിച്ച് വിവിധ പ്രദേശങ്ങളിലൂടെ വൈകിട്ട് അഞ്ചിന് കുറ്റ്യാടിയില്‍ സമാപിക്കുന്ന രീതിയിലാണ് പുസ്തക വണ്ടിയുടെ യാത്ര ക്രമീകരിച്ചിരിക്കുന്നത്. ഇതിലൂടെ അരലക്ഷം പുസ്തകങ്ങളാണ് ലക്ഷ്യമിടുന്നത്. ഗൃഹാങ്കണ പി.ടി.എ സംഗമങ്ങള്‍ക്ക് ഹെഡ്മാസ്റ്റര്‍ പി.കെ നവാസ്, സ്റ്റാഫ് സെക്രട്ടറി എം.രാജന്‍, പി.ടി.എ പ്രസിഡന്റ് ഇല്ലത്ത് അസീസ് മാസ്റ്റര്‍ നേതൃത്വം നല്‍കും.