മാവൂര്‍: പൊലിസ്-എക്‌സൈസ് പരിശോധനയില്ലാത്തതിനാല്‍ മാവൂരില്‍ രാപ്പകല്‍ വ്യത്യാസമില്ലാതെ പരസ്യ മദ്യവില്‍പ്പന.
ഗ്രാസിം റോഡിലെ അമീന്‍ ബില്‍ഡിങ്ങിനുസമീപമാണ് അനധികൃത മദ്യവില്‍പന. കൂളിമാട് റോഡില്‍നിന്ന് ഗ്രാസിം ഫാക്ടറിയിലേക്ക് റോഡ് തിരിയുന്നതിന് സമീപമാണ് കച്ചവടം നടക്കുന്നത്. മദ്യം വാങ്ങാന്‍ ഇതരജില്ലകളില്‍നിന്നടക്കം നിരവധിയാളുകള്‍ എത്തുന്നു. സമീപത്തെ കച്ചവടക്കാര്‍ക്കും സ്ഥാപനങ്ങളിലുള്ളവര്‍ക്കും വലിയ ശല്യമാണ് ഇതുണ്ടാക്കുന്നത്.
വിജനമായ സ്ഥലമായതിനാല്‍ ഈ ഭാഗത്തുകൂടി ആളുകള്‍ക്ക് വരാന്‍ ഭയമാണ്. വില്‍പനക്ക് ചില കച്ചവടക്കാരുടെ ഒത്താശയുമുണ്ടെന്നാണ് നാട്ടുകാര്‍ ആരോപിക്കുന്നത്. വിവിധ കേസുകളില്‍പ്പെട്ടവരാണ് മദ്യം വില്‍ക്കുന്നത്. ഫോണ്‍ മുഖാന്തരം ബന്ധപ്പെട്ടാലും മദ്യം ആവശ്യാനുസരണം എത്തിക്കും.
അനധികൃതമായി വന്‍തോതില്‍ ബിവറേജസുകളില്‍ നിന്നും ശേഖരിച്ചും ഇതര സംസ്ഥാനങ്ങളില്‍ നിന്നും കടത്തിയുമാണ് വില്‍പന നടത്തുന്നത്.