കോഴിക്കോട്: കേരളത്തിന്റെ ഉല്‍പന്നങ്ങള്‍ക്ക് ഇന്ത്യക്കകത്തും വിദേശത്തും വിപണി കണ്ടെത്തുന്നതിന് വാണിജ്യ മിഷന്‍ ആരംഭിക്കുമെന്നും ഒന്‍പതു മാസങ്ങള്‍ക്കുള്ളില്‍ തുടങ്ങുമെന്നും വ്യവസായ മന്ത്രി ഇ.പി ജയരാജന്‍.
കാലിക്കറ്റ് ചേംബര്‍ ഓഫ് കൊമേഴ്‌സിന്റെ പുതിയ ഭാരാവാഹികളുടെ സ്ഥാനാരോഹണ ചടങ്ങില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം. കേരളത്തിന്റെ വ്യാപാര രംഗം അന്തര്‍ദേശീയ രംഗത്തേക്ക് വ്യാപിക്കുകയാണ് ലക്ഷ്യം. പൊതു മേഖലയിലും സ്വകാര്യ മേഖലയിലും ഉല്‍പാദിപ്പിക്കുന്ന ഉല്‍പന്നങ്ങള്‍ക്ക് യൂറോപ്പ്, ചൈന, ഗള്‍ഫ് രാജ്യങ്ങള്‍ എന്നിവയടക്കം മാര്‍ക്കറ്റ് ഉണ്ടാക്കും. വിവിധ ഉല്‍പന്നങ്ങള്‍ നിര്‍മിക്കുന്നതിനാവശ്യമായ അസംസ്‌കൃത വസ്തുക്കള്‍ വില കുറച്ചും ഗുണമേന്മയോടും നല്‍കുകയും ചെയ്യുമെന്നും അദ്ദേഹം പറഞ്ഞു.
മാവൂര്‍ ഗ്വാളിയര്‍ റയോണ്‍സ് ഏറ്റെടുക്കുന്ന നടപടികളുമായി സര്‍ക്കാര്‍ മുന്നോട്ട് പോകുകയാണ്. മിഠായിത്തെരുവില്‍ പാര്‍ക്കിങ്ങും ഗതാഗത സൗകര്യവും അനുവദിക്കുന്ന കാര്യം ജില്ലാ കലക്ടറുടെയും മേയറുടെയും ശ്രദ്ധയില്‍പെടുത്തും. പാര്‍ക്കിങ് സംവിധാനം വ്യാപാരത്തിന് അത്യാവശ്യമായ കാലമാണിത്. ഇക്കാര്യത്തില്‍ ആവശ്യമായ പരിഹാരമുണ്ടാക്കാന്‍ കഴിയുമെന്നാണ് പ്രതീക്ഷയെന്നും മന്ത്രി പറഞ്ഞു. മുന്‍ പ്രസിഡന്റ് ഐപ് തോമസ് അധ്യക്ഷനായി. സുബൈര്‍ കൊളക്കാടന്‍ പ്രസിഡന്റും രാജേഷ് കുഞ്ഞപ്പന്‍ സെക്രട്ടറിയുമായ കമ്മിറ്റിയാണ് ചുമതലയേറ്റത്. ടി.പി അഹ്മദ്‌കോയ, ഡോ. എ.എം ശരീഫ്, എം. മുസമ്മില്‍, പി.എ ആസിഫ്, ഡോ. കെ. മൊയ്തു, സി.ഇ ചാക്കുണ്ണി, പി,ടി,എസ് ഉണ്ണി സംബന്ധിച്ചു.