കോട്ടയം: നിക്ഷേപക തട്ടിപ്പ് കേസില്‍ അറസ്റ്റിലായിരുന്ന കോട്ടയം കുന്നത്തുകളത്തില്‍ ഗ്രൂപ്പ് ഉടമ കെ.വി വിശ്വനാഥന്‍(68) കെട്ടിടത്തില്‍ നിന്ന് വീണ് മരിച്ച നിലയില്‍. കസ്റ്റഡിയിലിരിക്കെ ചികിത്സയിലായിരുന്ന നഗരത്തിലെ സ്വകാര്യ ആശുപത്രി കെട്ടിടത്തിന്റെ നാലാം നിലയില്‍ നിന്നും ചാടി മരിച്ച നിലയിലാണ് കണ്ടെത്തിയത്.

പൊലിസിന്റെ കണ്ണുവെട്ടിച്ച് ഇയാള്‍ രാവിലെ എട്ടരയോടെ ആശുപത്രിക്കെട്ടിടത്തിന്റെ മുകളില്‍ നിന്ന് ചാടി മരിക്കുകയായിരുന്നുവെന്നാണ് പ്രാഥമിക നിഗമനം.

കോടികളുടെ സാമ്പത്തിക ബാധ്യതയുടെ പേരില്‍ പാപ്പര്‍ ഹരജി സമര്‍പ്പിച്ച വിശ്വനാഥനും ഗ്രൂപ്പ് ഉടമകളായ ഭാര്യയ്ക്കും മകള്‍ക്കും മരുമകനുമെതിരെ പിന്നീട് പൊലിസ് 14 കേസുകള്‍ ചുമത്തിയിരുന്നു. 35 കോടിയോളം നിക്ഷേപ തട്ടിപ്പുണ്ടെന്നാണ് പ്രഥമദൃഷ്ട്യാ കേസ് നിലവിലുള്ളത്.