ശ്രീനഗര്‍: പാകിസ്താനിലെ ബാലാകോട്ടില്‍ മിന്നലാക്രമണത്തെ തുടര്‍ന്ന് തകര്‍ത്ത ജെയ്‌ഷെ മുഹമ്മദിന്റെ ഭീകര കേന്ദ്രങ്ങള്‍ കൂടുതല്‍ ശക്തിയാര്‍ജിച്ച് പ്രവര്‍ത്തനം തുടങ്ങിയതായി രഹസ്യാന്വേഷണ റിപ്പോര്‍ട്ട്.
ജമ്മുകശ്മിരിനു നേരെ ആക്രണം നടത്താന്‍ ഇവിടെ 40 അംഗ പ്രത്യേക സംഘം പരിശീലനം പൂര്‍ത്തിയാക്കിയതായും റിപ്പോര്‍ട്ടുണ്ട്.
പുല്‍വാമയില്‍ 40 സി.ആര്‍. പി.എഫ് ജവാന്മാര്‍ കൊല്ലപ്പെടാനിടയായ സംഭവത്തിന് പിന്നാലെയാണ് ആക്രമണത്തിന് നേതൃത്വം നല്‍കിയിരുന്ന ജെയ്‌ഷെ മുഹമ്മദിന്റെ പാകിസ്താനില്‍ പ്രവര്‍ത്തിക്കുന്ന ബാലാകോട്ടിലെ താവളങ്ങള്‍ക്കുനേരെ വ്യോമ സേന മിന്നലാക്രമണം നടത്തിയത്. ആക്രമണത്തില്‍ വലിയ നാശനഷ്ടങ്ങളാണ് വ്യോമ സേന ഉണ്ടാക്കിയത്.
ഇന്ത്യയുടെ ശക്തമായ ഇടപെടലിനെ തുടര്‍ന്ന് ലോക രാഷ്ട്രങ്ങളുടെ സമ്മര്‍ദത്തെ തുടര്‍ന്ന് ഭീകര സംഘടനകള്‍ക്കെതിരേ പാകിസ്താന്‍ നിലപാട് സ്വീകരിച്ചിരുന്നു. എന്നാല്‍ ഓഗസ്റ്റ് അഞ്ചിന് അവര്‍ നിലപാട് മയപ്പെടുത്തിയതോടെയാണ് വീണ്ടും ഭീകര സംഘടനകള്‍ തങ്ങളുടെ പ്രവര്‍ത്തനം ശക്തമാക്കാന്‍ തുടങ്ങിയത്.
ഫെബ്രുവരി 27നാണ് വ്യോമ സേനയുടെ യുദ്ധ വിമാനങ്ങള്‍ പാകിസ്താനിലെ മാന്‍ഷേര, ഖൈബര്‍ പ്രവിശ്യയില്‍ സ്ഥിതി ചെയ്യുന്ന ബാലാകോട്ടിലെ അത്യാധുനിക സൗകര്യങ്ങളോടെയുള്ള ഭീകര താവളങ്ങള്‍ക്കുനേരെ ആക്രമണം നടത്തിയത്. മറ്റു ചില സംസ്ഥാനങ്ങളിലും ആക്രമണം നടത്താന്‍ ജെയ്‌ഷെ പദ്ധതിയിടുന്നുണ്ടെന്നാണ് ലഭ്യമായ വിവരമെന്ന് രഹസ്യാന്വേഷണ വിഭാഗം പറയുന്നു.