തിരുവനന്തപുരം: രണ്ടാമത് ലോക കേരള സഭയ്ക്കുള്ള ഒരുക്കങ്ങള്‍ സര്‍ക്കാര്‍ ആരംഭിച്ചു. അടുത്ത വര്‍ഷം ജനുവരിയില്‍ നിയമസഭയില്‍ ലോക കേരള സഭ ചേരാനാണ് തീരുമാനം.
ജനുവരി 16നും 20നുമിടയിലുള്ള ഏതെങ്കിലും രണ്ട് ദിവസങ്ങളിലായിരിക്കും സമ്മേളനം ചേരുക. ആന്തൂരില്‍ പ്രവാസി വ്യവസായി സാജന്‍ ആത്മഹത്യ ചെയ്ത സംഭവത്തിന്റെ പശ്ചാത്തലത്തില്‍ പ്രതിപക്ഷ നേതാവ് ഉള്‍പ്പെടെ അംഗങ്ങള്‍ ലോക കേരള സഭയില്‍നിന്നും രാജിവച്ചിരുന്നു.
ഈ സാഹചര്യത്തിലാണ് രണ്ടാം ലോക കേരള സഭ ചേരാന്‍ പോകുന്നത്. അതിനിടെ ലോക കേരള സഭയില്‍ പങ്കെടുക്കുന്നതിന് പ്രതിപക്ഷത്തെ അനുനയിപ്പിക്കുന്നതിനുള്ള ശ്രമങ്ങള്‍ സര്‍ക്കാര്‍ ആരംഭിച്ചിട്ടുണ്ട്. ലോക കേരള സഭയില്‍നിന്ന് രാജിവച്ച പ്രതിപക്ഷ അംഗങ്ങള്‍ രാജി പിന്‍വലിക്കണമെന്ന് മുഖ്യമന്ത്രി പിണറായി വിജയനും സ്പീക്കര്‍ പി.ശ്രീരാമകൃഷ്ണനും അന്നുതന്നെ ആവശ്യപ്പെട്ടിരുന്നതാണ്. പ്രശ്‌നപരിഹാരത്തിനായി പ്രതിപക്ഷ നേതാവ് ഉള്‍പ്പെടെയുള്ളവരുമായി ചര്‍ച്ച നടത്താനാണ് സര്‍ക്കാര്‍ നീക്കം.
2018 ജനുവരി 12, 13 തിയതികളിലാണ് ആദ്യ ലോകകേരള സഭാ സമ്മേളനം ചേര്‍ന്നത്. ഇതില്‍വച്ച് ലോക കേരളസഭയുടെ ഉപസമിതികള്‍ നല്‍കിയ 48 നിര്‍ദേശങ്ങള്‍ ക്രോഡീകരിച്ച് പത്തെണ്ണമാക്കി അവ സമയബന്ധിതമായി പൂര്‍ത്തിയാക്കാന്‍ തീരുമാനിച്ചിരുന്നു. ഇതില്‍ പ്രവാസി നിക്ഷേപ കമ്പനി സര്‍ക്കാര്‍ രൂപീകരിക്കുകയും ചെയ്തിരുന്നു.
ഒന്നാം സമ്മേളനത്തിനു ശേഷം കഴിഞ്ഞ ഫെബ്രുവരി 15, 16 തീയതികളില്‍ ലോക കേരളസഭയുടെ മേഖലാ സമ്മേളനം ദുബൈയില്‍ സംഘടിപ്പിക്കുകയും ചെയ്തു.
വിവിധരാജ്യങ്ങളിലും പ്രദേശങ്ങളിലും അധിവസിക്കുന്ന കേരളീയര്‍ തമ്മില്‍ ആശയവിനിമയം സാധ്യമാക്കുന്നതിനും പരസ്പര സഹകരണം ഉറപ്പുവരുത്തുന്നതിനും കേരളത്തെ ഒരുമിപ്പിച്ചുനിര്‍ത്തുന്നതിനുമുള്ള ഒരു സംവിധാനം എന്ന നിലയിലാണ് ലോക കേരള സഭ രൂപീകരിച്ചത്.
ഒന്നാം സമ്മേളനത്തെതുടര്‍ന്ന് ഏറ്റെടുക്കുന്ന പ്രവര്‍ത്തനങ്ങളുടെ പുരോഗതി രണ്ടുവര്‍ഷത്തിനുള്ളില്‍ ചേരുന്ന രണ്ടാമത് സമ്മേളനം പരിശോധിക്കാനും തീരുമാനിച്ചിരുന്നു. അതിന്റെ ഭാഗമായാണ് അടുത്ത വര്‍ഷം ആദ്യം രണ്ടാം സമ്മേളനം ചേരുന്നത്.