കാട്ടാമ്പള്ളി: കളഞ്ഞുകിട്ടിയ പേഴ്‌സും എ.ടി.എം കാര്‍ഡും തിരിച്ചുനല്‍കി വിദ്യാര്‍ഥി മാതൃകയായി. നാറാത്ത് ഫലാഹ് ഇംഗ്ലിഷ് മീഡിയം സ്‌കൂളിലെ ആറാംക്ലാസ് വിദ്യാര്‍ഥി മുഹമ്മദാണ് സത്യസന്ധത കാട്ടി മാതൃകയായത്. മുഹമ്മദിന്റെ സത്യസന്ധതയില്‍ 22,000 രൂപയും നാല് എ.ടി.എം കാര്‍ഡും ഡ്രൈവിങ് ലൈസന്‍സുമാണ് ഉടമസ്ഥനു തിരിച്ചുകിട്ടിയത്.
കഴിഞ്ഞ ശനിയാഴ്ചയാണ് പൂതപ്പാറ സ്വദേശി മിദ്‌ലാജിന്റെ പഴ്‌സ് പുതിയതെരുവിലേക്കുള്ള യാത്രാമധ്യേ നഷ്ടപ്പെട്ടത്. ശനിയാഴ്ച രാവിലെ പുതിയതെരുവില്‍ മത്സ്യം വാങ്ങാന്‍ പോയ മുഹമ്മദിന് റോഡില്‍വച്ച് പേഴ്‌സ് ലഭിക്കുകയായിരുന്നു. പഴ്‌സ് കിട്ടിയ വിവരം ഉമ്മയെ അറിയിക്കുകയും മിദ്‌ലാജിനെയും കൂട്ടി വളപട്ടണം സ്റ്റേഷനിലെത്തി പൊലിസിനെ ഏല്‍പ്പിക്കുകയും ചെയ്തു. കാട്ടാമ്പള്ളിയിലെ സലീമിന്റെയും രിള്‌വാനയുടെയും മകനാണു മുഹമ്മദ്.