പൊന്നാനി: കേരളത്തിന്റെ വിവിധ ഭാഗങ്ങളില്‍ വ്യാപകമായി കാണപ്പെടുന്ന ചിത്രശലഭങ്ങളുടെ ദേശാടനത്തെക്കുറിച്ച് പഠിക്കാന്‍ ഒരു കൂട്ടം പരിസ്ഥിതി പ്രവര്‍ത്തകര്‍ രംഗത്ത്.
ഫേണ്‍സ് എന്ന കൂട്ടായ്മയാണ് മറ്റു സംഘടനകളുടെയും താല്‍പര്യമുള്ള ആളുകളുടെയും സഹകരണത്തോടെ ശലഭങ്ങളുടെ ദേശാടനത്തെക്കുറിച്ച് സമഗ്രമായ വിവരങ്ങള്‍ ശേഖരിക്കാന്‍ മുന്‍കൈയെടുക്കുന്നത്.
ശലഭങ്ങളുടെ സഞ്ചാരദിശ, കേരളത്തില്‍ കാണപ്പെടുന്ന കാലം, സ്ഥലം, ദേശാടനത്തിന് കാരണമാകുന്ന ഘടകങ്ങള്‍ തുടങ്ങിയവയാണ് നിരീക്ഷണ വിധേയമാക്കുന്നത്. ഇക്കാര്യങ്ങളില്‍ കൃത്യമായ പഠനം നടന്നിട്ടില്ലെന്ന് ശലഭ നിരീക്ഷകനായ സുജിന്‍ പറയുന്നു.
ശലഭങ്ങളെ നിരീക്ഷിച്ച ആളുടെ പേര് ശലഭം കാണപ്പെട്ട സ്ഥലം തിയതി, സഞ്ചാര ദിശ തുടങ്ങിയവ 9846704353, 9497402761 എന്നീ നമ്പറുകളിലേക്ക് വാട്ട്‌സ് ആപ് വഴി ഫേണ്‍സ് പ്രവര്‍ത്തകരെ അറിയിക്കുകയാണ് ചെയ്യേണ്ടത്.കഴിഞ്ഞ ഏതാനും ദിവസങ്ങളായി കേരളത്തില്‍ പല സ്ഥലങ്ങളിലും ചിത്രശലഭങ്ങളുടെ ദേശാടനം കാണുന്നുണ്ട്. കൂട്ടമായി ശലഭങ്ങള്‍ ഒരേ ദിശയില്‍ കടന്നു പോവുകയാണ് ചെയ്യുന്നത്. നീലക്കടുവ, അരളി തുടങ്ങിയ ശലഭങ്ങളാണ് കേരളത്തില്‍ സര്‍വ്വ സാധാരണമായി കാണപ്പെടുന്ന ദേശാടന ശലഭങ്ങള്‍.
ഈ സാഹചര്യത്തിലാണ് വിവിധ പരിസ്ഥിതി സംഘടനകളുടെയും കൂട്ടായ്മകളുടെയും സഹായത്തോടെ ശലഭങ്ങളുടെ ദേശാടനത്തെ കൃത്യമായി നിരീക്ഷിക്കാനും പഠനവിവരങ്ങള്‍ ശേഖരിക്കാനും ഫേണ്‍സ് മുന്നിട്ടിറങ്ങുന്നത്. വൈകാതെ ഇതിനെ കൂടുതല്‍ സമഗ്രതയോടെ ഒരു പൗരശാസ്ത്ര പദ്ധതി എന്ന നിലയില്‍ കൂടുതല്‍ ആളുകളെ ഉള്‍പ്പെടുത്തി മുന്നോട്ടു കൊണ്ടുപോകുകയാണ് ചെയ്യുക. യദു ആറളം, മുനീര്‍ തോല്‍പ്പെട്ടി എന്നിവരാണ് വിവരശേഖരണ പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്.