ന്യൂയോര്‍ക്ക്: ബാങ്ക് തട്ടിപ്പ് നടത്തി രാജ്യംവിട്ട നീരവ് മോദിയുടെ അമ്മാവന്‍ മെഹുല്‍ ചോക്‌സിയെ ഇന്ത്യയ്ക്കു വിട്ടുനല്‍കുമെന്ന് ആന്റിഗ്വ പ്രധാനമന്ത്രി ഗാസ്റ്റണ്‍ ബ്രൗണി. ഇന്ത്യന്‍ ഉദ്യോഗസ്ഥര്‍ ക്ലീന്‍ ചിറ്റ് നല്‍കിയതു കാരണമാണ് പൗരത്വം നല്‍കിയതെന്നും അദ്ദേഹം വെളിപ്പെടുത്തി.

മെഹുല്‍ ചോക്‌സിക്ക് പൗരത്വം നല്‍കിയതു കൊണ്ട് രാജ്യത്തിന് നേട്ടമൊന്നും ഉണ്ടായിട്ടില്ല. അദ്ദേഹത്തിന്റെ അപ്പീലുകളിലെല്ലാം തീര്‍പ്പുകല്‍പ്പിച്ചാല്‍ ഇന്ത്യയിലേക്ക് തിരിച്ചയക്കും. സമയത്തിന്റെ പ്രശ്‌നം മാത്രമേ മുന്‍പിലുള്ളൂവെന്നും അദ്ദേഹം പറഞ്ഞു.

ഇന്ത്യന്‍ ഉദ്യോഗസ്ഥര്‍ക്കാണ് മെഹുല്‍ ചോക്‌സി രാജ്യത്ത് എത്തിയതിന്റെയും പൗരത്വം നല്‍കിയതിന്റെയും പൂര്‍ണ ഉത്തരവാദിത്തമെന്നും അദ്ദേഹം പറഞ്ഞു. ഇന്ത്യന്‍ ഉദ്യോഗസ്ഥര്‍ എല്ലാം ഓകെ പറഞ്ഞതു കൊണ്ടാണ് പൗരത്വം നല്‍കിയതെന്നും അദ്ദേഹം പറഞ്ഞു.

ഇന്ത്യന്‍ അന്വേഷണ ഉദ്യോഗസ്ഥര്‍ക്ക് അദ്ദേഹത്തെ വന്ന് കാണാമെന്നും അഭിമുഖം ചെയ്യാമെന്നും ഗാസ്റ്റണ്‍ ബ്രൗണി പറഞ്ഞു.