തിരുവനന്തപുരം: അണ്ടര്‍ 19 ചലഞ്ചര്‍ ട്രോഫിക്കുള്ള ഇന്ത്യ ഗ്രീന്‍ ടീമിലേക്ക് കേരളത്തിന്റെ വത്സല്‍ ഗോവിന്ദിനെ തിരഞ്ഞെടുത്തു. ഓള്‍ റൗണ്ടറായ യുവതാരം നിലവില്‍ കേരള അണ്ടര്‍ 19 ടീം ക്യാപ്റ്റനാണ്.
ചാലക്കുടി സ്വദേശിയായ വത്സല്‍ ഗോവിന്ദ് തൃശൂര്‍ കേരള വര്‍മ കോളജിലെ ഒന്നാം വര്‍ഷ ബി.എ ഇംഗ്ലീഷ് ബിരുദ വിദ്യാര്‍ഥിയാണ്. നേരത്ത, വിജയ് മെര്‍ച്ചന്റ് ട്രോഫി ടൂര്‍ണമെന്റില്‍ അണ്ടര്‍ 16 ഡല്‍ഹി ടീമിനെ പ്രതിനിധീകരിച്ചിട്ടുണ്ട്.
2017 മുതല്‍ കേരളത്തിന് വേണ്ടി കളിച്ചു തുടങ്ങി. ഡല്‍ഹിയില്‍ ഉഷ ഇലക്ട്രിക്കല്‍സില്‍ ഉദ്യോഗസ്ഥനായ ഗോവിന്ദ് കനകന്റെയും റൂമാ ഗോവിന്ദ് ശര്‍മയുടെയും മകനാണ്.
ഇന്ത്യ ബ്ലൂ, ഇന്ത്യ റെഡ്, ഇന്ത്യ ഗ്രീന്‍, ഇന്ത്യ യെല്ലോ എന്നീ നാല് ടീമുകളാണ് ചലഞ്ചര്‍ ട്രോഫിയില്‍ കളിക്കുക. ടൂര്‍ണമെന്റ് ഈ മാസം 10 മുതല്‍ 16 വരെ ലഖ്‌നൗവില്‍ നടക്കും.