കല്ലമ്പലം: നാവായിക്കും പഞ്ചായത്തില്‍ പ്ലാസ്റ്റിക് സംസ്‌കരണ യൂനിറ്റ് ഇല്ലാത്തതിനാല്‍ പ്രദേശത്ത് പ്ലാസ്റ്റിക് മാലിന്യം കുന്നുകൂടുന്നതായി പരാതി. ദേശീയപാതയില്‍ നാവായിക്കുളം, എതുക്കാട്, മങ്ങാട്ടുവാതുക്കല്‍ തുടങ്ങി കടമ്പാട്ടുകോണം വരെയും പറകുന്ന്, മുക്കുകട, പട്ടാളം മുക്ക്, പൈവേലിക്കോണം പ്രദേശങ്ങളിലെ ഇടറോഡുകളിലുമാണ് മാലിന്യക്കൂനകള്‍ ഉള്ളത്. കടകളിലും ചന്തകളിലും കാറ്ററിങ് സ്ഥാപനങ്ങളിലും നിന്നുള്ള മാലിന്യമാണ് ഇതില്‍ ഭൂരിഭാഗവും.
മാലിന്യങ്ങള്‍ വാഹനങ്ങളില്‍ കൊണ്ടുവന്ന് റോഡരികിലും ഒഴിഞ്ഞ പുരയിടങ്ങളിലും തള്ളുകയാണ് പതിവെന്ന് നാട്ടുകാര്‍ പറഞ്ഞു. പഞ്ചായത്തില്‍ മുഴുവന്‍ വാര്‍ഡുകളിലും പ്ലാസ്റ്റിക്ക് മാലിന്യം കെട്ടി കിടക്കുകയാണ്. സംസ്‌കരണ യൂനിറ്റ് വന്നാല്‍ പ്ലാസ്റ്റിക് മാലിന്യം ഇല്ലാതെയാക്കാം. മഴക്കാലമായതോടെ പ്ലാസ്റ്റിക് മാലിന്യം തോടിലും കുളങ്ങളിലും ഒഴുകി നടക്കുകയാണ്.
പഞ്ചായത്തിലെ കുളങ്ങളും തോടുകളുമെല്ലാം പ്ലാസ്റ്റിക് മാലിന്യം കൊണ്ടു നിറഞ്ഞു. അവ വൃത്തിയാക്കിയാലും പിന്നെയും മാലിന്യം വലിച്ചെറിയും. എന്നാല്‍ പ്ലാസ്റ്റിക്ക് മാലിന്യം നീക്കം ചെയ്യാന്‍ നടപടികള്‍ തുടങ്ങിയതായി നാവായിക്കുളം പഞ്ചായത്ത് ഭരണസമിതി അറിയിച്ചു.