പേരാമ്പ്ര: നൊച്ചാട് പഞ്ചായത്ത് ഏഴാം വാര്‍ഡിലെ കേളോത്ത് ഭാഗം കനാല്‍ പാലം റോഡില്‍നിന്ന് കുഴി വെട്ടി സ്വകാര്യ വ്യക്തി തന്റെ വയല്‍ നികത്തിയിട്ട് ആഴ്ചകള്‍ കഴിഞ്ഞിട്ടും യാതൊരു നടപടിയും സ്വീകരിക്കാത്ത പഞ്ചായത്ത് ഭരണസമിതിയുടെ നിലപാടില്‍ പ്രതിഷേധം ശക്തമാകുന്നു.
പൊതുമുതല്‍ നശിപ്പിച്ചതിനും റോഡ് കൈയേറിയതിനും ഭരണസമിതി കൂട്ടു നില്‍ക്കുകയാണെന്ന് യു.ഡി.എഫ് വാര്‍ഡ് കമ്മിറ്റി ആരോപിച്ചു. വാര്‍ഡിലെ വളരെ പിന്നാക്കം നില്‍ക്കുന്ന പ്രദേശത്തുകൂടി കടന്നു പോകുന്ന റോഡില്‍ നേരത്തെയും സ്വകാര്യ വ്യക്തികളുടെ കൈയേറ്റവും റോഡിന്റെ കരിങ്കല്‍കെട്ട് തകര്‍ക്കുകയും ചെയ്തിരുന്നു. ഈ വിഷയങ്ങളിലെല്ലാം സി.പി.എം നേതൃത്വത്തിന്റെ സമ്മര്‍ദ്ദത്തിന് വഴങ്ങി പഞ്ചായത്ത് ഭരണസമിതിയും ജീവനക്കാരും സ്വകാര്യ വ്യക്തികളെ സംരക്ഷിക്കാന്‍ ശ്രമിച്ചതിന്റെ ഫലമാണ് ഇപ്പോള്‍ ഇക്കൂട്ടര്‍ കൂടുതല്‍ സ്വാതന്ത്ര്യത്തോടെ പ്രവര്‍ത്തിക്കുന്നതെന്നും കമ്മിറ്റി ആരോപിച്ചു.
റോഡിനായി കഴിഞ്ഞ ഭരണസമിതി അനുവദിച്ച ഫണ്ടില്‍ ഉള്‍പ്പെടുത്തി ഇരുഭാഗത്തും കരിങ്കല്‍കെട്ട് പ്രവൃത്തി നടത്തിയിരുന്നു. വയല്‍ഭാഗത്ത് കൂടി കടന്നുപോകുന്ന റോഡിന്റെ ബഹുഭൂരിപക്ഷവും ഒരാളുടേതും കുറഞ്ഞ ഭാഗം മാത്രം രണ്ടു സി.പിഎം പ്രവര്‍ത്തകരുടെ കൈവശത്തിലുള്ളതുമാണ്. ഇവര്‍ക്ക് അനുകൂലമായ നിലപാടാണ് പഞ്ചായത്ത് ഭരണസമിതി സ്വീകരിച്ചു വന്നത്.
ഈ ഭരണസമിതി വന്നപ്പോള്‍ അനുവദിച്ച ഫണ്ട് ഉപയോഗപ്പെടുത്തി റോഡ് വികസനം നടത്തിയെങ്കിലും സ്വകാര്യ വ്യക്തികളുടെ താല്‍പര്യം സംരക്ഷിക്കാന്‍ അനുവദിച്ച ഫണ്ട് വെട്ടികുറയ്ക്കുകയും പണി പാതിവഴിയില്‍ ഉപേക്ഷിക്കുകയും ചെയ്യുകയായിരുന്നു.
റോഡില്‍നിന്ന് മണ്ണെടുത്ത് വയല്‍ നികത്തിയ വ്യക്തി പഞ്ചായത്ത് സെക്രട്ടറിയുടെ ബന്ധുവും സി.പിഎം നേതാക്കള്‍ക്കും ഭരണ സമിതിക്കും വേണ്ടപ്പെട്ടവനായത് കൊണ്ടുമാണ് യാതൊരു നടപടിയും സ്വീകരിക്കാത്തതെന്ന് യു.ഡി.എഫ് നേതാക്കള്‍ പറഞ്ഞു.
ഇതിനെതിരേ യു.ഡി.എഫ് പഞ്ചായത്ത്, വില്ലേജ്, അധികൃതര്‍ക്കും പൊലിസിലും നല്‍കിയ പരാതിയിലും യാതൊരു നടപടിയും എടുത്തിയില്ലെന്നും ഭാരവാഹികള്‍ ആരോപിച്ചു.