മാങ്ങാട്ടുപറമ്പ്: രണ്ടണ്ടു ദിവസങ്ങളായി മാങ്ങാട്ടുപറമ്പ്  സര്‍വകലാശാല ഇന്‍ഡോര്‍ സ്റ്റേഡിയത്തില്‍ നടന്ന കേരള ആരോഗ്യ സര്‍വകലാശാലാ സോണല്‍ പുരുഷ വോളിബോള്‍ ചാംപ്യന്‍ഷിപ്പില്‍ കോഴിക്കോട് മെഡിക്കല്‍ കോളജ് കിരീടം ചൂടി. ആതിഥേയരായ കണ്ണൂര്‍ ഗവ.മെഡിക്കല്‍ കോളജിനെ നേരിട്ടുള്ള സെറ്റുകള്‍ക്കാണ് പരാജയപ്പെടുത്തിയത്. സ്‌കോര്‍. 25-23, 25-18, 25-17. ലൂസേഴ്‌സ് ഫൈനലില്‍ ക്രസന്റ് നഴ്‌സിങ്ങ് കോളജ് പഴയങ്ങാടിയെ നേരിട്ടുള്ള സെറ്റുകള്‍ക്ക് തോല്‍പ്പിച്ച് ഗവ.ആയുര്‍വേദ കോളജ് പരിയാരം മൂന്നാം സ്ഥാനം കരസ്ഥമാക്കി.  ജേതാക്കള്‍ക്കുള്ള ട്രോഫികള്‍ കണ്ണൂര്‍ സര്‍വകലാശാല സ്‌പോര്‍ട്‌സ് ഡയരക്ടര്‍ ഇന്‍ ചാര്‍ജ് ഡോ.വി.എ വിത്സണ്‍ വിതരണം ചെയ്തു. കണ്ണൂര്‍, കാസര്‍ക്കോട്, വയനാട്, കോഴിക്കോട് ജില്ലകളിലെ മെഡിക്കല്‍, ആയുര്‍വേദ, ഹോമിയോ, നഴ്‌സിങ്ങ്, ഫാര്‍മസി, പാരാമെഡിക്കല്‍ വിദ്യാര്‍ഥികളാണ് മത്സരത്തില്‍ പങ്കെടുത്തത്. ആദ്യത്തെ നാലു സ്ഥാനക്കാര്‍ സംസ്ഥാന ചാംപ്യന്‍ഷിപ്പിന് യോഗ്യത നേടി. കണ്ണൂര്‍ ഗവ.മെഡിക്കല്‍ കോളജാണ് മല്‍സരത്തിന് ആതിഥേയത്വം വഹിച്ചത്.