തിരുവനന്തപുരം: ബ്ലെയ്ഡു മാഫിയ വ്യാജപ്രമാണം ചമച്ച്  60 ലക്ഷം രൂപ വില വരുന്ന വീട് തട്ടിയെടുത്തതായി പരാതി. കഴക്കൂട്ടം സ്വദേശികളായ ചന്ദ്രന്‍, സുധ ദമ്പതികളുടെ  വീടാണ് തട്ടിയെടുത്തത്.  ബ്ലെയ്ഡു മാഫിയ സംഘത്തലവരായ അജയകുമാര്‍, ശാന്തമ്മ എന്നിവരാണ്  തട്ടിപ്പു നടത്തിയതെന്ന് ഇവര്‍ പറയുന്നു.
മകന്‍ രാഹുലിന്റെ എന്‍ജിനിയറിങ് പഠനത്തിനായി ഇവര്‍ ബ്ലെയ്ഡുകാരിയായ  ശാന്തയില്‍ നിന്നും എട്ടു ലക്ഷം രൂപ വായ്പ വങ്ങിയിരുന്നു. വീടും സ്ഥലവും ഈട് വെച്ചായിരുന്നു തുക വാങ്ങിയത്. എന്നാല്‍ ഈടായി വാങ്ങിയ സ്ഥലവും വീടും ശഷാന്തച വിലയാധാരാമായി മാറ്റിയെന്ന് ഇവര്‍ പറയുന്നു. രണ്ടു വര്‍ഷത്തിനുശേഷം ഗുണ്ടകളുമായി വന്ന് ഭീഷണിപ്പെടുത്തി വീട്ടില്‍ നിന്നും തന്നെയും മകനെയും ഇറക്കിവിട്ടപ്പോഴാണ് സംഭവം അറിയുന്നതെന്നും സുധ പറഞ്ഞു. വര്‍ഷങ്ങളായി ദുബായിയില്‍ ജോലി ചെയ്യുന്ന ചന്ദ്രന്‍ സംഭവം അറിഞ്ഞ് നാട്ടിലെത്തിയപ്പോള്‍ വീടും സ്ഥലവും നഷ്ടപ്പെട്ടിരുന്നു. ചന്ദ്രന് ജോലിക്ക് തിരിച്ചുപോവാനാത്ത സ്ഥിതിയാണ്. പഠനം പൂര്‍ത്തിയാക്കിയെങ്കിലും രാഹുലിന് ഇതുവരെ ജോലിയൊന്നും ലഭിച്ചിട്ടില്ല. ഇപ്പോള്‍ വാടകവീട്ടിലാണ് ഇവരുടെ താമസം.
ബ്ലെയ്ഡു മാഫിയയില്‍ നിന്നും പണംവാങ്ങി കഴക്കൂട്ടം സബ് രജിസ്ട്രാര്‍ അനധികൃതമായി പ്രമാണം ചമച്ചു നല്‍കിയെന്നും ഇവര്‍ ആരോപിക്കുന്നു.
അനന്തരാവകാശിയായ ചന്ദ്രന്റെ അറിവോ സമ്മതമോ കൂടാതെയാണ് സബ് രജിസ്റ്റാര്‍ പ്രമാണം പതിച്ച് നല്‍കിയത്. എട്ട് ലക്ഷം രൂപയ്ക്ക് അധിക പലിശ ശാന്തയ്ക്ക് നല്‍കിയിട്ടുണ്ടെന്നും ദമ്പദികള്‍ പറയുന്നു. വീടും സ്ഥലവും ഇപ്പോള്‍ മറ്റാര്‍ക്കോ വില്‍ക്കാന്‍ സംഘം ശ്രമിക്കുകയാണ്. ഇത് തടയണമെന്നും അന്വേഷണ വിധേയമായി സബ് രജിസ്ട്രാറെ സസ്‌പെന്റ് ചെയ്യണമെന്നും പട്ടികജാതി വര്‍ഗ്ഗ ഐക്യവേദി വാര്‍ത്താസമ്മേളനത്തില്‍ ആവശ്യപ്പെട്ടു. ബ്ലെയ്ഡു മാഫിയ സംഘത്തെ ഓപ്പറേഷന്‍ കുബേരയില്‍ ഉള്‍പ്പെടുത്തി അറസ്റ്റു ചെയ്യണമെന്നും അമിത പലിശ ഈടാക്കിയതിന് മണി ലെന്റേഴ്‌സ് നിയമം മൂലം കേസെടുക്കണമെന്നും ഐക്യവേദി ആവശ്യപ്പെട്ടു.
വാര്‍ത്താസമ്മേളനത്തില്‍ ചന്ദ്രന്‍, സുധ, കെ.എസ്.ഡി.പി സംസ്ഥാന ചെയര്‍മാന്‍ ഐത്തിയൂര്‍ സുരേന്ദ്രന്‍, ജനറല്‍ സെക്രട്ടറിമാരായ തൈയ്ക്കാട് വിജയകുമാര്‍, ശൈലജ നന്തന്‍കോട്, കൊട്ടാരക്കര ശ്യാമളവല്ലി, കെ.എസ്.ഡി.എം.എഫ് സംസ്ഥാന പ്രസിഡന്റ് സുശീല ബി.നായര്‍, അംബേദ്ക്കര്‍പുരം മുരുകന്‍ എന്നിവര്‍ പങ്കെടുത്തു.