ന്യൂഡല്‍ഹി: തമിഴ്‌നാട് ആര്‍.കെ നഗര്‍ ഉപതെരഞ്ഞെടുപ്പില്‍ വോട്ടര്‍മാര്‍ക്കു കൈക്കൂലി നല്‍കിയതുമായി ബന്ധപ്പെട്ട കേസില്‍ മുഖ്യമന്ത്രി എടപ്പാടി കെ. പളനിസാമി, ആരോഗ്യമന്ത്രി സി. വിജയ് ഭാസ്‌കര്‍, അണ്ണാ ഡി.എം.കെ ഡപ്യൂട്ടി ജനറല്‍ സെക്രട്ടറി ടി.ടി.വി ദിനകരന്‍ എന്നീ നേതാക്കള്‍ക്കെതിരേ കേസെടുക്കാന്‍ തെരഞ്ഞെടുപ്പ് കമ്മിഷന്‍ നിര്‍ദേശം നല്‍കി. വോട്ടര്‍മാര്‍ക്ക് പണം വിതരണംചെയ്യുന്നതിന്റെ ദൃശ്യങ്ങളടങ്ങിയ വീഡിയോ സാമൂഹിക മാധ്യമങ്ങളിലൂടെ വ്യാപകമായി പ്രചരിച്ചതിനെതുടര്‍ന്നാണ് സ്വകാര്യവക്തി കമ്മിഷന് അപേക്ഷനല്‍കിയത്. സംഭവത്തില്‍ ദിനകരനെതിരേ എഫ്.ഐ.ആര്‍ രജിസ്റ്റര്‍ ചെയ്യാന്‍ ഉത്തരവിട്ടതായി കമ്മിഷന്‍ അറിയിച്ചു.
ആര്‍.കെ നഗര്‍ ഉപതെരഞ്ഞെടുപ്പിനിടെ വോട്ടര്‍മാരെ സ്വാധീനിക്കാനായി വ്യാപകമായി പണം വിതരണംചെയ്തത് സംബന്ധിച്ച് മന്ത്രി വിജയ്ഭാസ്‌കറിന്റെ വസതിയില്‍ നടത്തിയ പരിശോധനകളില്‍ നിരവധിരേഖകള്‍ ലഭിച്ചതായി ആദായനികുതി വകുപ്പ് നേരത്തെ കമ്മിഷനെ അറിയിച്ചിരുന്നു. വിഷയത്തില്‍ ഉചിതമായ നടപടി ഉണ്ടാകണമെന്ന് കമ്മിഷന്‍ അധികൃതരോട് ആവശ്യപ്പെട്ടു.
അണ്ണാ ഡി.എം.കെ ശശികല വിഭാഗത്തിന്റെ സ്ഥാനാര്‍ഥിയായിരുന്ന ദിനകരനു വേണ്ടി വോട്ട്‌ചെയ്യാന്‍ 89 കോടി രൂപ വിതരണംചെയ്‌തെന്നു കണ്ടെത്തിയതോടെ ഏപ്രില്‍ 12നു നടന്ന വോട്ടെടുപ്പ് തെരഞ്ഞെടുപ്പ് കമ്മിഷന്‍ റദ്ദാക്കിയിരുന്നു.
അണ്ണാ ഡി.എം.കെ നേതാവും മുഖ്യമന്ത്രിയുമായ ജയലളിതയുടെ മരണത്തിനു പിന്നാലെ പാര്‍ട്ടിയില്‍ ആഭ്യന്തരകലഹം മൂര്‍ച്ഛിച്ചിരിക്കെ പാര്‍ട്ടിയുടെ രണ്ടില ചിഹ്നം തിരഞ്ഞെടുപ്പ് കമ്മിഷന്‍ മരവിപ്പിച്ചിരുന്നു. അത് ലഭിക്കാന്‍ തെരഞ്ഞെടുപ്പ് കമ്മിഷന്‍ ഉദ്യോഗസ്ഥരെ പണം നല്‍കി സ്വാധീനിക്കാന്‍ ശ്രമിച്ചതിന് നേരത്തെ ദിനകരന്‍ അടക്കമുള്ളവര്‍ക്കെതിരേ കേസ് നിലവിലുണ്ട്. ഇടനിലക്കാരനായി പ്രവര്‍ത്തിച്ച സുകേശ് ചന്ദ്രശേഖര്‍ ആഢംബര കാറില്‍ 1.3 കോടി രൂപ സഹിതം പോലീസ് പിടിയിലായിരുന്നു.
ഇയാളുടെ കൂട്ടാളികളും ഹവാല ഇടപാടുകാരുമായ നത്തു സിങ്, ലളിത് കുമാര്‍ എന്നിവരും പിന്നീട് പൊലിസ് വലയിലായതോടെയാണ് അന്വേഷണം ദിനകരന്‍ ഉള്‍പ്പെടെയുള്ള നേതാക്കളിലേക്കു നീണ്ടത്. തുടര്‍ന്ന് ദിനകരനടക്കമുള്ളവരെ ഡല്‍ഹിയില്‍ വിളിച്ചുവരുത്തി ചോദ്യം ചെയ്യുകയും അറസ്റ്റ് രേഖപ്പെടുത്തുകയുമായിരുന്നു. ഈ കേസില്‍ ദിനകരനും കൂട്ടുപ്രതികളും ഇപ്പോള്‍ ജാമ്യത്തിലിറങ്ങിയിരിക്കുകയാണ്.