കോഴിക്കോട്: കോര്‍പറേഷന്‍ സ്റ്റേഡിയത്തില്‍ ജില്ലാ ഫുട്‌ബോള്‍ അസോസിയേഷന്റെ ആഭിമുഖ്യത്തില്‍ ആരംഭിച്ച പ്രഥമ വനിതാ ഫുട്‌ബോള്‍ ലീഗില്‍ താരങ്ങള്‍ മിന്നുന്ന പ്രകടനം കാഴ്ചവച്ചു. അഞ്ചു ടീമുകളാണ് പരസ്പരം മത്സരിച്ചത്. രണ്ടു ദിവസത്തെ മത്സരത്തില്‍ ഗ്രൂപ്പ് ചാംപ്യന്‍മാരെ വിജയികളായി പ്രഖ്യാപിക്കും.
അടുത്തവര്‍ഷം മുതല്‍ ലീഗ് വിപുലീകരിക്കാനാണ് ലക്ഷ്യമിടുന്നത്. ഐ ലീഗിലും കേരള പ്രീമിയര്‍ ലീഗിലും മത്സരിച്ച താരങ്ങള്‍ ഉള്‍പ്പെട്ടതാണ് ഗ്രൂപ്പുകള്‍. ഇന്നലെ നടന്ന ആദ്യമത്സരത്തില്‍ ഓള്‍ഡേ സ്‌പോര്‍ട്‌സ് അക്കാദമി ഒന്നിനെതിരേ രണ്ടു ഗോളുകള്‍ക്ക് ഭാരത് സ്‌പോര്‍ട്ടിങ് അക്കാദമിയെ പരാജയപ്പെടുത്തി. രണ്ടാമത്തെ മത്സരത്തില്‍ ക്വാര്‍ട്‌സ് എഫ്.എ എതിരില്ലാത്ത ആറു ഗോളുകള്‍ക്ക് യുനൈറ്റഡ് സ്‌പോര്‍ട്‌സ് അക്കാദമിയെ പരാജയപ്പെടുത്തി.
മൂന്നാമത്തെ മത്സരത്തില്‍ ക്വാര്‍ട്‌സ് എഫ്.സി എതിരില്ലാത്ത ഏഴു ഗോളുകള്‍ക്ക് ഭാരത് സ്‌പോര്‍ട്ടിങ് അക്കാദമിയെ പരാജയപ്പെടുത്തി. നാലാമത്തെ മത്സരത്തില്‍ ഓള്‍ഡേ സ്‌പോര്‍ട്‌സ് അക്കാദമി എതിരില്ലാത്ത രണ്ടു ഗോളുകള്‍ക്ക് യുനൈറ്റഡ് സ്‌പോര്‍ട്‌സ് അക്കാദമിയെ പരാജയപ്പെടുത്തി. അവസാന മത്സരത്തില്‍ ക്വാര്‍ട്‌സ് എഫ്.സി എതിരില്ലാത്ത മൂന്നു ഗോളുകള്‍ക്ക് ക്വാര്‍ട്‌സ് എഫ്.എയെ പരാജയപ്പെടുത്തി.