രാജപുരം: റേഷന്‍കാര്‍ഡു ലഭിക്കണമെങ്കില്‍ ബാങ്ക് അക്കൗണ്ട് നമ്പര്‍, ആധാര്‍ നമ്പര്‍ എന്നിവ വീണ്ടും നല്‍കണമെന്ന പൊതുവിതരണ വകുപ്പ് അറിയിപ്പ് ദീര്‍ഘവീക്ഷണമില്ലായ്മയാണെന്ന്  ആക്ഷേപം. നേരത്തെ നല്‍കിയ അപേക്ഷയില്‍ തന്നെ കര്‍ശന നിര്‍ദേശം സര്‍ക്കാര്‍ നല്‍കാത്തതാണു  ഉപഭോക്താക്കള്‍ക്ക് വിനയായത്.
എല്ലാ റേഷന്‍ കടകളിലും അതാതു താലൂക്ക് സപ്ലൈ ഓഫിസുകള്‍ വഴിയാണ് അറിയിപ്പു വന്നത്. ഒന്നര വര്‍ഷം മുമ്പ് നല്‍കിയ വിവരങ്ങള്‍ കൂടാതെ വീണ്ടും നല്‍കണമെന്ന നിര്‍ദേശം ഉപഭോക്താക്കളിലും ഡീലര്‍മാര്‍ക്കിടയിലും പ്രതിഷേധത്തിനിടയാക്കി.
2015 ഡിസംബര്‍ 31 ന് മുമ്പായി തെറ്റ് തിരുത്തല്‍ നടപടി പൂര്‍ത്തിയാക്കി ഉടന്‍ റേഷന്‍ കാര്‍ഡ് ലഭിക്കുമെന്നു കരുതി കാത്തിരുന്ന ഉപഭോക്താക്കള്‍ക്കു ലഭിച്ചതു വിവരങ്ങള്‍ വീണ്ടും നല്‍കണമെന്ന അറിയിപ്പാണ്.
നേരത്തെ നല്‍കിയ അപേക്ഷകളില്‍ ഇപ്പോള്‍ ആവശ്യപ്പെട്ട വിവരങ്ങള്‍ പൂര്‍ണമായും നല്‍കിയ കാര്‍ഡുടമകള്‍ക്കു വിവരങ്ങള്‍ വീണ്ടും നല്‍കേണ്ടത് എന്തിനെന്നു ഇനിയും മനസിലായിട്ടില്ല.
റേഷന്‍ കാര്‍ഡിന് അപേക്ഷയും നല്‍കി ഉപഭോക്താക്കള്‍ കാത്തിരിക്കാന്‍ തുടങ്ങിയിട്ട് ഒന്നര വര്‍ഷം പിന്നിട്ടു.
റേഷന്‍ കാര്‍ഡ് എന്നു വിതരണം ചെയ്യാന്‍ സാധിക്കുമെന്നും ഭക്ഷ്യവകുപ്പിന് ഉറപ്പില്ല.
        കാര്‍ഡ് വിതരണത്തിലെ കാലതാമസം പുതിയ അപേക്ഷകരെയും ദുരിതത്തിലാക്കിയിരിക്കുകയാണ്. എന്നാല്‍ ആദ്യം നല്‍കിയ അപേക്ഷകളില്‍ കാര്‍ഡില്‍ ഉള്‍പ്പെട്ട എല്ലാ അംഗങ്ങളുടേയും ആധാര്‍, ബാങ്ക് അക്കൗണ്ട് നമ്പറുകള്‍ നിര്‍ബന്ധമാക്കിയിരുന്നില്ലെന്നും ഭക്ഷ്യ സുരക്ഷയുടെ ഭാഗമായി പൊതുവിതരണ സമ്പ്രദായം കംപ്യൂട്ടര്‍വല്‍കരിക്കുന്നതിനു പുതിയ ഉത്തരവനുസരിച്ചാണ് വീണ്ടും ആധാര്‍, ബങ്ക് നമ്പറുകള്‍ ഉപഭോക്താക്കളോട് ആവശ്യപ്പെട്ടിട്ടുള്ളതെന്നും താലൂക്ക് സപ്ലൈ ഓഫിസര്‍ പറഞ്ഞു.
നേരത്തെ പൂര്‍ണ വിവരങ്ങള്‍ നല്‍കിയിട്ടുണ്ടെന്ന് ഉറപ്പുള്ളവര്‍ വീണ്ടും നല്‍കേണ്ടതില്ലെന്നാണ് സപ്ലൈ ഓഫിസില്‍ നിന്നുള്ള വിവരം.
അതേ സമയം, കാര്‍ഡിന്റെ ഡാറ്റാ എന്‍ട്രി പ്രവര്‍ത്തികള്‍ വേഗത്തിലാക്കാന്‍ പൂര്‍ണമായും നല്‍കിയ അപേക്ഷകളിലെ നമ്പറുകളില്‍ നിന്ന് കാര്‍ഡിലുള്‍പ്പെട്ട ഒരാളുടെ നമ്പര്‍ മാത്രം എന്റര്‍ ചെയ്താല്‍ മതിയെന്ന് അധികൃതരുടെ നിര്‍ദേശമുണ്ടായിരുന്നതായും സൂചനയുണ്ട്.