ബാഴ്‌സലോണ: ക്യാംപ് നൗവിലേക്ക് വിരുന്നെത്തിയ ലാലിഗ മത്സരത്തില്‍ സ്വന്തം ആരാധകര്‍ക്ക് മുന്നില്‍ സീസണിലെ ആദ്യ ഗോളടിച്ച് സൂപ്പര്‍ താരം ലയണല്‍ മെസ്സി.
ലീഗിലെ കരുത്തരായ സെവിയ്യയെയാണ് ടീം എതിരില്ലാത്ത നാലു ഗോളുകള്‍ക്ക് തോല്‍പ്പിച്ചത്. ബാഴ്‌സ നിരയില്‍ രണ്ടു പോര്‍ ചുവപ്പു കാര്‍ഡ് കണ്ട മത്സരത്തിലാണ് ടീമിന്റെ വമ്പന്‍ ജയം. ലൂയിസ് സുവാരസ് (27), അര്‍തുറോ വിദാല്‍ (32), ഒസ്മാനെ ഡെംബലെ(35) എന്നിവര്‍ ചേര്‍ന്ന് ടീമിനെ മുന്നിലെത്തിച്ച ശേഷം 78ാം മിനുട്ടില്‍ ബാഴ്‌സയ്ക്കനുകൂലമായെത്തിയ ഫ്രീകിക്കിലാണ് മെസ്സിയുടെ ഗോളടിനേട്ടം. റഫറിയുമായുള്ള വാക്കു തര്‍ക്കത്തെ തുടര്‍ന്ന് 87, 88 മിനുട്ടുകളില്‍ റൊണാള്‍ഡ് ആരായു, ഒസ്മാനെ ഡെംബലെ എന്നിവര്‍ക്കെതിരേയാണ് റഫറി ചുവപ്പു കാര്‍ഡ് നീട്ടിയത്.
ജയത്തോടെ ബാഴ്‌സ ലീഗില്‍ രണ്ടാം സ്ഥാനത്തേക്കുയര്‍ന്നു. ലീഗില്‍ എട്ട് മത്സരങ്ങള്‍ പൂര്‍ത്തിയായപ്പോള്‍ 18 പോയിന്റുള്ള റയലിന് പിന്നിലായി 16 പോയിന്റോടെയാണ് ബാഴ്‌സ രണ്ടാമതെത്തിയത്.