കേന്ദ്ര-സംസ്ഥാന സര്‍ക്കാരുകളുടെ അവഗണനക്കെതിരേ ജനപ്രതിനിധികളുടെ കലക്ടറേറ്റ് ഉപവാസം 22ന് 

കല്‍പ്പറ്റ: ദേശീയ തൊഴിലുറപ്പ് പദ്ധതിയിലെ തൊഴിലാളികളുടെ കൂലിയിനത്തില്‍ ജില്ലയില്‍ 18 കോടി രൂപ കുടിശ്ശിക. കൂലി യഥാസമയം ലഭിക്കാതെ ആയിരക്കണക്കിനു തൊഴിലാളി കുടുംബങ്ങളാണ് വിഷമിക്കുന്നത്.
ആദിവാസികള്‍ അടക്കമുള്ള നിര്‍ധനരുടെ കൂലി നല്‍കാത്ത കേന്ദ്രസര്‍ക്കാരിന്റെയും, നടപടിയെടുക്കാത്ത സംസ്ഥാന സര്‍ക്കാറിന്റെയും നിലപാടുകള്‍ക്കെതിരേ ജില്ലയില്‍ ശക്തമായ പ്രതിഷേധമുയരുന്നുണ്ട്.
തൊഴിലുറപ്പ് പദ്ധതിയിലെ തൊഴിലാളികളുടെ കൂലി തടഞ്ഞുവെച്ച കേന്ദ്രസര്‍ക്കാരിന്റെയും, ഇടപെടല്‍ നടത്താത്ത സംസ്ഥാന സര്‍ക്കാരിന്റെയും നടപടിയില്‍ പ്രതിഷേധിച്ച് 22ന് യു.ഡി.എഫ് ജനപ്രതിനിധികള്‍ കലക്ടറേറ്റ് പടിക്കല്‍ ഉപവാസം സംഘടിപ്പിക്കും.
കേന്ദ്ര സംസ്ഥാന സര്‍ക്കാരുകള്‍ പരസ്പരം പഴിചാരി തൊഴിലാളികളെ വിഢികളാക്കുന്ന സമീപനമാണ് സ്വീകരിച്ചിരിക്കുന്നത്.
ഇക്കാര്യത്തില്‍ സംസ്ഥാന സര്‍ക്കാരും, ജില്ലാ ഭരണകൂടവും നിസ്സംഗത തുടര്‍ന്നാല്‍ തൊഴിലാളികളെ സംഘടിപ്പിച്ച് ശക്തമായ ബഹുജന പ്രക്ഷോഭവുമായി മുന്നോട്ട് പോകുമെന്ന് ജില്ലാ പഞ്ചായത്ത് പ്രസിഡന്റ് ടി. ഉഷാകുമാരി, വൈസ് പ്രസിഡന്റ് പി.കെ അസ്മത്ത്, സ്റ്റാന്‍ഡിങ്് കമ്മിറ്റി ചെയര്‍മാന്‍ പി.കെ അനില്‍കുമാര്‍ എന്നിവര്‍ വാര്‍ത്താസമ്മേളനത്തില്‍ അറിയിച്ചു.