കണ്ണൂര്‍: ജില്ലാ പൊലിസ് കായികമേളയില്‍ തലശ്ശേരി സബ്ബ് ഡിവിഷന്‍ 100 പോയിന്റുമായി ചാംപ്യന്‍മാരായി. കണ്ണൂര്‍ ജില്ലാ ഹെഡ് ക്വാര്‍ട്ടേഴ്‌സ് 78 പോയിന്റുമായി രണ്ടാം സ്ഥാനവും ഇരിട്ടി സബ്ബ് ഡിവിഷന്‍ 73 പോയിന്റുമായി മൂന്നാം സ്ഥാനവും കരസ്ഥമാക്കി. ഇരിട്ടി, തലശ്ശേരി, തളിപ്പറമ്പ്, കണ്ണൂര്‍ എന്നീ നാലു സബ് ഡിവിഷനുകളും ഒരു സ്‌പെഷല്‍ യൂനിറ്റും ജില്ലാ ഹെഡ് ക്വാര്‍ട്ടേഴ്‌സും ഉള്‍പ്പെട്ട ആറു ഡിവിഷനുകളിലായാണ് മത്സരം നടന്നത്. 10,000 മീറ്റര്‍ കണ്ണൂര്‍ ഡിസ്ട്രിക്റ്റ് ഹെഡ് ക്വാര്‍ട്ടേഴ്‌സിന്റെ മരിയ ജോസും 1500 മീറ്റര്‍ ഓട്ട മത്സരത്തില്‍ കണ്ണൂര്‍ ഡിസ്ട്രിക്റ്റ് ഹെഡ് ക്വാര്‍ട്ടേഴ്‌സിന്റെ തന്നെ അനൂപും ഒന്നാമതെത്തി. ഷോട്ട്പുട്ടില്‍ തലശ്ശേരി സബ്ബ് ഡിവിഷനിലെ അബ്ദുള്‍ നിഷാദ് ഒന്നാമതെത്തി. ഫുട്‌ബോളില്‍ കണ്ണൂര്‍ ഡിസ്ട്രിക്റ്റ് ഹെഡ് ക്വാര്‍ട്ടേഴ്‌സും ക്രിക്കറ്റില്‍ തലശ്ശേരി സബ് ഡിവിഷനും വിജയികളായി. മാര്‍ച്ച്പാസ്റ്റില്‍ കണ്ണൂര്‍ ജില്ലാ ഹെഡ് ക്വാര്‍ട്ടേഴ്‌സ് ഒന്നാമതെത്തി. പൊലിസ് പരേഡ് ഗ്രൗണ്ടില്‍ നടന്ന സമാപന ചടങ്ങില്‍ സി.ആര്‍.പി.എഫ് പെരിങ്ങോം ഡി.ഐ.ജി എം.ജെ വിജയ് മുഖ്യാതിഥിയായി.