നരിക്കുനി: സി.എം മഖാം ശരീഫിലെ 27ാം ഉറൂസ് മുബാറക് ജൂണ്‍ 29 മുതല്‍ ജൂലായ് മൂന്നു വരെ മടവൂരില്‍ നടക്കുമെന്ന് സ്വാഗതസംഘം ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. ശവ്വാല്‍ നാല് മുതല്‍ എട്ട് വരെവര്‍ഷം തോറും നടത്തുന്ന പരിപാടിയാണിത്.
ഈ വര്‍ഷത്തെ ഉറൂസ് മുബാറകിന് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളുടെ നേതൃത്വത്തില്‍ നടക്കുന്ന മഖാം സിയാറത്തോടെ ശവ്വാല്‍ നാലിന് രാവിലെ 10 മണിക്ക് തുടക്കമാവും. സി.എം കുഞ്ഞിമാഹിന്‍ മുസ്‌ലിയാര്‍ കൊടി ഉയര്‍ത്തും. തുടര്‍ന്ന് നടക്കുന്ന ഓത്തിടലിന് ശേഷം 10.30നുള്ള മൗലിദ് സദസിന് ഒളവണ്ണ അബൂബക്കര്‍ മുസ്‌ലിയാര്‍, എന്‍. അബ്ദുല്ല മുസ്‌ലിയാര്‍, കെ.കെ ഇബ്‌റാഹിം മുസ്‌ലിയാര്‍ തുടങ്ങിയവര്‍ നേതൃത്വം നല്‍കും.
ജൂണ്‍ 29ന് ഉച്ചക്ക് രണ്ട് മണിക്ക് നടക്കുന്ന അശ്അരി പണ്ഡിത സംഗമം സമസ്ത മുശാവറ അംഗം വി. മൂസക്കോയ മുസ്‌ലിയാര്‍ വയനാട് ഉദ്ഘാടനം ചെയ്യും. ഓണമ്പിള്ളി മുഹമ്മദ് ഫൈസി വിഷയാവതരണം നടത്തും. രാത്രി ഏഴിന് നടക്കുന്ന മതപ്രഭാഷണം സയ്യിദ് നാസര്‍ ഹയ്യ് ശിഹാബ് തങ്ങള്‍ ഉദ്ഘാടനം ചെയ്യും. ഖലീല്‍ ഹുദവി കാസര്‍കോട് പ്രഭാഷണം നടത്തും. ജൂണ്‍ 30 വെള്ളിയാഴ്ച മഗ്‌രിബിനു ശേഷം നടക്കുന്ന മജ്‌ലിസുന്നൂറിന് സയ്യിദ് അലവിക്കോയ തങ്ങള്‍ ബുഖാരി നേതൃത്വം നല്‍കും. തുടര്‍ന്നു നടക്കുന്ന ഹാഫിള് അഹമ്മദ് കബീര്‍ ബാഖവി കാഞ്ഞാറിന്റെ പ്രഭാഷണം അത്വാഉള്ള തങ്ങള്‍ മഞ്ചേശ്വരം ഉദ്ഘാടനം ചെയ്യും.
ജൂലൈ ഒന്നിന് രാവിലെ ഒന്‍പത് മണിക്ക് നടക്കുന്ന ഹജ്ജ് പഠന ക്ലാസ് സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവി ഉദ്ഘാടനം ചെയ്യും.
റഫീഖ് സകരിയ്യ ഫൈസി കൂടത്തായ് ക്ലാസിന് നേതൃത്വം നല്‍കും. രാത്രി എട്ടിന് നടക്കുന്ന മതപ്രഭാഷണ വേദിയുടെ ഉദ്ഘാടനം കോഴിക്കോട് ഖാസി സയ്യിദ് മുഹമ്മദ്‌കോയ തങ്ങള്‍ ജമലുല്ലൈലി നിര്‍വഹിക്കും.
സിംസാറുല്‍ ഹഖ് ഹുദവി പ്രഭാഷണം നടത്തും. ജൂലൈ രണ്ടിന് രാവിലെ ഒന്‍പതിന് നടക്കുന്ന സി.എം അനുസ്മരണ സമ്മേളനം സമസ്ത ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. കെ.പി മാമുഹാജി അധ്യക്ഷനാകും. അബ്ദുല്‍ മജീദ് ബാഖവി അനുസ്മരണ പ്രഭാഷണം നിര്‍വഹിക്കും.
രാത്രി ഏഴിന് നടക്കുന്ന ദിക്‌റ് ദുആ സമ്മേളനം സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. പാണക്കാട് സയ്യിദ് സ്വാദിഖലി ശിഹാബ് തങ്ങള്‍ അധ്യക്ഷനാകും. വാവാട് കുഞ്ഞിക്കോയ മുസ്‌ലിയാര്‍ സദസിന് നേതൃത്വം നല്‍കും. ജൂലൈ മൂന്നിന് രാവിലെ മുതല്‍ വൈകുന്നേരം വരെ നടക്കുന്ന അന്നദാനത്തോടെ ഉറൂസ് മുബാറക് സമാപിക്കും.
സി.എം മഖാം ഓഫിസില്‍ നടന്ന വാര്‍ത്താസമ്മേളനത്തില്‍ കെ.പി മാമുഹാജി, സി.എം കുഞ്ഞിമാഹിന്‍ മുസ്‌ലിയാര്‍, മൂത്താട്ട് അബ്ദുറഹിമാന്‍ മാസ്റ്റര്‍, യു. ഷറഫുദ്ദീന്‍ മാസ്റ്റര്‍, കെ.എം മുഹമ്മദ് മാസ്റ്റര്‍, ടി.പി.സി മുഹമ്മദ്‌കോയ ഫൈസി, എ.പി നാസര്‍ മാസ്റ്റര്‍, വി.സി റിയാസ്ഖാന്‍, ഫൈസല്‍ ഫൈസി, ഹാരിസ് അശ്അരി പങ്കെടുത്തു.