കൊച്ചി: നൂറുകണക്കിന് പ്രവര്‍ത്തകരുടേയും അനുഭാവികളുടേയും അകമ്പടിയോടെ കൊച്ചി മെട്രൊയില്‍ മുന്‍മുഖ്യമന്ത്രി ഉമ്മന്‍ചാണ്ടിയുടെ നേതൃത്വത്തില്‍ യു.ഡി.എഫ് നേതാക്കള്‍ ജനകീയയാത്ര നടത്തി. പ്രതിപക്ഷ നേതാവ് രമേശ് ചെന്നിത്തല, കെ.പി.സി.സി അധ്യക്ഷന്‍ എം.എം ഹസന്‍, കെ.വി തോമസ് എംപി, വി.കെ ഇബ്രാഹിംകുഞ്ഞ് എം.എല്‍.എ, മുന്‍ മന്ത്രി ആര്യാടന്‍ മുഹമ്മദ്, എം.എല്‍.എമാരായ അനൂപ് ജേക്കബ് പി.ടി തോമസ്, അന്‍വര്‍ സാദത്ത്, ഹൈബി ഈഡന്‍, ഷാഫി പറമ്പില്‍, എ.ഐ.സി.സി സെക്രട്ടറി പി.സി വിഷ്ണുനാഥ് അടക്കമുള്ള നിരവധി നേതാക്കളും ഒപ്പമുണ്ടായിരുന്നു.
ആലുവയില്‍ നിന്ന് പാലാരിവട്ടം വരെയായിരുന്നു കോണ്‍ഗ്രസ് നേതാക്കളുടെ യാത്ര. ട്രെയിനില്‍ കയറാന്‍ പ്രവര്‍ത്തകര്‍ക്ക് കോണ്‍ഗ്രസ് ടിക്കറ്റ് എടുത്ത് നല്‍കിയിരുന്നു. ഉമ്മന്‍ ചാണ്ടിയെ മുദ്രാവാക്യം വിളിയോടെയാണ് പ്രവര്‍ത്തകര്‍ സ്വീകരിച്ചത്. പ്രവര്‍ത്തകരുടെ ആവേശം അണമുറിഞ്ഞതോടെ ഉമ്മന്‍ ചാണ്ടിക്കു സുരക്ഷ ഒരുക്കാന്‍ ജീവനക്കാര്‍ ഏറെ പാടുപെട്ടു.
പാലാരിവട്ടം മെട്രൊ സ്റ്റേഷനു മുന്നില്‍ യു.ഡി.എഫ് ജില്ലാകമ്മിറ്റിയുടെ നേതൃത്വത്തില്‍ നേതാക്കളെ സ്വീകരിച്ചു.
മെട്രോയുടെ നിര്‍മാണപ്രവര്‍ത്തത്തിന്റെ ഭൂരിഭാഗവും പൂര്‍ത്തിയാക്കിയത് ഉമ്മന്‍ ചാണ്ടിയുടെ കാലത്തായിരുന്നു. മെട്രോയുടെ ഉദ്ഘാടനത്തിന് ഉമ്മന്‍ ചാണ്ടിയെയും സ്ഥലത്തെ ജനപ്രതിനിധികളേയും ക്ഷണിക്കാതിരുന്ന നടപടി വിവാദമായിരുന്നു. ഇതിനു മറുപടിയെന്നോണമാണു മെട്രൊയില്‍ പ്രവര്‍ത്തകര്‍ക്കൊപ്പം ജനകീയ യാത്ര നടത്താന്‍ ഉമ്മന്‍ചാണ്ടി തീരുമാനിച്ചത്.