തിരുവനന്തപുരം: പകര്‍ച്ചവ്യാധികള്‍ തുടക്കത്തില്‍ തന്നെ കണ്ടെത്തി രോഗത്തെ വേരോടെ പിഴുതെറിയാന്‍ മെഡിക്കല്‍ കോളജ് ആശുപത്രിയില്‍ ഔട്ട്‌ബ്രേക്ക് മോണിറ്ററിങ് യൂനിറ്റ് സജ്ജമായി. കേരളത്തിന് പേടിസ്വപ്നമായി മാറിയ നിപാ വൈറസിന്റെ കടന്നുവരവിന്റെ പശ്ചാത്തലത്തില്‍ പകര്‍ച്ചവ്യാധികളെ തടയാന്‍ വിവിധ മാര്‍ഗങ്ങള്‍ അവലംബിച്ചിരുന്നു. അതില്‍ ഏറ്റവും പ്രധാനപ്പെട്ട ഒന്നാണ് ഔട്ട്‌ബ്രേക്ക് മോണിറ്ററിങ് യൂനിറ്റ് സംവിധാനം. തിരുവനന്തപുരം മെഡിക്കല്‍ കോളജിലെതെന്നതുപോലെ സംസ്ഥാനത്തെ എല്ലാ മെഡിക്കല്‍ കോളജുകളിലും പുത്തന്‍ സംവിധാനം എത്തിക്കാന്‍ സംസ്ഥാന ആരോഗ്യവകുപ്പുമന്ത്രി കെ.കെ ശൈലജടീച്ചര്‍ നടപടി സ്വീകരിച്ചിരുന്നു. ആശുപത്രി സൂപ്രണ്ടിന്റെ മേല്‍നോട്ടത്തില്‍ മെഡിസിന്‍, പീഡിയാട്രിക്, ഇന്‍ഫെക്ഷ്യസ് ഡിസീസ്, കമ്മ്യൂണിറ്റി മെഡിസിന്‍, മൈക്രോബയോളജി, പത്തോളജി, ഫോറന്‍സിക് മെഡിസിന്‍ എന്നീ വിഭാഗങ്ങളിലെ നോഡല്‍ ഓഫിസര്‍മാരെ ഉള്‍പ്പെടുത്തിക്കൊണ്ടാണ് പുതിയ സംവിധാനം ഏര്‍പ്പെടുത്തിയിരിക്കുന്നത്. കേസിന്റെ പ്രാധാന്യം അനുസരിച്ച് ന്യൂറോളജി, ഗ്യാസ്‌ട്രോ എന്റോളജി എന്നീവിഭാഗങ്ങളുടെ വിദഗ്‌ധോപദേശവും സ്വീകരിക്കും.പുതുതായി വരുന്ന സാംക്രമികരോഗങ്ങളെ വളരെ നേരത്തേ തന്നെ കണ്ടെത്തുക എന്നതാണ് ഇതിന്റെ ലക്ഷ്യം. അസ്വഭാവികമായ രോഗലക്ഷണങ്ങള്‍ ഏതെങ്കിലും രോഗിയില്‍ കണ്ടാലോ അല്ലെങ്കില്‍ സംശയം തോന്നുകയോ ചെയ്താല്‍ ചികിത്സിക്കുന്ന ഡോക്ടര്‍ ഔട്ട് ബ്രേക്ക് മോണിറ്ററിങ് യൂനിറ്റിനെ അറിയിക്കും. തുടര്‍ന്ന് രോഗിയെ നിരീക്ഷിക്കുന്ന യൂനിറ്റംഗങ്ങള്‍ രോഗവിവരങ്ങള്‍ ചര്‍ച്ച ചെയ്തശേഷം സാമ്പിളുകള്‍ മൈക്രോബയോളജി വിഭാഗത്തില്‍ എത്തിക്കും. അവിടെ ഒന്നില്‍കൂടുതല്‍ വൈറസുകളെയും ബാക്ടീരിയകളെയും ഒന്നിച്ചുകണ്ടെത്താനുള്ള മള്‍ട്ടിപ്ലക്‌സ് ഡി.സി.ആര്‍ എന്ന പരിശോധന നടത്തും. അതില്‍ കൃത്യമായ പരിശോധനാഫലം ലഭിച്ചില്ലെങ്കില്‍ നാഷണല്‍ ഇന്‍സ്റ്റിറ്റ്യൂട്ട് ഓഫ് വൈറോളജിയില്‍ അയക്കും. അങ്ങനെ എമര്‍ജിങ് ഇന്‍ഫെക്ഷനുകളും റീ എമര്‍ജിങ് ഇന്‍ഫെക്ഷനുകളുമെല്ലാം കണ്ടെത്താനും പ്രതിരോധപ്രവര്‍ത്തനങ്ങള്‍ എത്രയും വേഗം ആരംഭിക്കാനും സാധിക്കും.
ഇനിയും മാരകമായ പകര്‍ച്ചവ്യാധികള്‍ക്ക് കടന്നുവരാനുള്ള സാധ്യത മുന്‍കൂട്ടിക്കണ്ട് അവയെ പ്രതിരോധിക്കാന്‍ സ്വീകരിച്ച പുത്തന്‍ സംവിധാനത്തിന് പൊതുജനങ്ങളില്‍ നിന്നും വന്‍സ്വീകാര്യതയാണ് ലഭിച്ചിരിക്കുന്നത്.