കയ്പമംഗലം: ഗതാഗതം വഴിമുട്ടിയപ്പോള്‍ റോഡിലെ കുഴികളടക്കാന്‍ ഒടുവില്‍ നാട്ടുകാര്‍ തന്നെ രംഗത്തിറങ്ങി. ഈസ്റ്റ് ടിപ്പു സുല്‍ത്താന്‍ റോഡില്‍ പെരിഞ്ഞനം പഞ്ചായത്തിലെ കാക്കാത്തിരുത്തി മുതല്‍ ആര്‍.വി.എച്ച്.എസ്.സ്‌കൂള്‍ വരെയുള്ള ഭാഗങ്ങളിലാണ് നാട്ടുകാരുടെ ശ്രമഫലമായി റോഡിലെ കുഴികളടച്ച് സഞ്ചാര സൗകര്യമൊരുക്കിയത്. കാലങ്ങളായി വളരെ ദുര്‍ഘടമായി കിടന്നിരുന്ന കാക്കാത്തിരുത്തി, പൊന്‍മാനിക്കുടം, ആര്‍.എം.വി.എച്ച്.എസ്.സ്‌കൂള്‍ റോഡ് സഞ്ചാരയോഗ്യമാക്കണമെന്ന ജനങ്ങളുടെ ആവശ്യം അധികൃതര്‍ അവഗണിച്ചതോടെയാണ് റോഡിന്റെ ശോചനീയാവസ്ഥ പരിഹരിക്കാന്‍ നാട്ടുകാര്‍ തന്നെ മുന്നിട്ടിറങ്ങിയത്. 

ഇതിനിടെ ഈസ്റ്റ് ടിപ്പു സുല്‍ത്താന്‍ റോഡിന്റെ ഒരു ഭാഗത്ത് ഗ്രാമപഞ്ചായത്തിന്റെ നേതൃത്വത്തില്‍ ചെറിയ രൂപത്തിലുള്ള അറ്റകുറ്റ പണികള്‍ നടത്തിയതായി നാട്ടുകാര്‍ പറഞ്ഞു. എന്നാല്‍ റോഡിന്റെ ശോചനീയാവസ്ഥ പൂര്‍ണമായി പരിഹരിക്കാന്‍ പഞ്ചായത്ത് തയാറാവാതിരുന്നതോടെയാണ് ഉപകരണങ്ങളുമായി നാട്ടുകാര്‍ റോഡിലിറങ്ങിയത്.
ദിവസവും അഞ്ഞൂറില്‍ പരം രോഗികള്‍ ചികിത്സ തേടിയെത്തുന്ന പെരിഞ്ഞനം കുറ്റിലക്കടവ് സാമൂഹികാരോഗ്യ കേന്ദ്രത്തിലേക്കും ആയിരക്കണക്കിന് വിദ്യാര്‍ഥികള്‍ പഠനം നടത്തുന്ന ആര്‍.വി.എച്ച്.എസ്.സ്‌കൂളിലേക്കും എത്തിപ്പെടാന്‍ വിദ്യാര്‍ഥികളടക്കം സഞ്ചാരത്തിനായി ഉപയോഗപ്പെടുത്തുന്ന റോഡാണിത്. ശോചനീയാവസ്ഥയിലായ ഈസ്റ്റ് ടുപ്പു സുല്‍ത്താന്‍ റോഡടക്കം പെരിഞ്ഞനത്തെ റോഡുകളുടെ ദുര്‍ഘടാവസ്ഥ അടിയന്തിരമായി പരിഹരിക്കണമെന്നാവശ്യപ്പെട്ട് പി.ടി.എയുടെ നേതൃത്വത്തില്‍ ആര്‍.വി.എച്ച്.എസ്.സ്‌കൂള്‍ അധികൃതരും രംഗത്തെത്തിയിരുന്നു.
വര്‍ഷങ്ങളായി കുണ്ടും കുഴിയുമായി കിടക്കുന്ന ഈ ഭാഗത്ത് മഴ പെയ്ത് കുഴികളില്‍ വെള്ളം നിറഞ്ഞതോടെ ഇരുചക്ര വാഹന യാത്രികരടക്കം തീര്‍ത്തും ദുരിതത്തിലായിരിക്കുകയാണ്.
വിദ്യാര്‍ഥികളടക്കമുള്ള നൂറ് കണക്കിന് യാതക്കാരുടെ സുരക്ഷിതത്വം ഉറപ്പു വരുത്താന്‍ ശോചനീയാവസ്ഥിയിലായ കാക്കാത്തിരുത്തി ഈസ്റ്റ് ടിപ്പു സുല്‍ത്താന്‍ റോഡ് ഉടന്‍ പുനര്‍ നിര്‍മാണം നടത്തണമെന്നാണ് നാട്ടുകാരുടെ ആവശ്യം.