വേങ്ങര: പറപ്പൂര്‍ പഞ്ചായത്തിലെ പ്രളയബാധിതരായ നിരവധി കുടുംബങ്ങള്‍ സര്‍ക്കാറിന്റെ ലിസ്റ്റില്‍ നിന്ന് പുറത്തായ സംഭവത്തില്‍ മണ്ഡലം എം.എല്‍.എ കെ.എന്‍.എ ഖാദര്‍ കലക്ടറുമായി ചര്‍ച്ച നടത്തി. പ്രാഥമിക പരിശോധന നടത്തി പറപ്പൂര്‍ വില്ലേജ് ഓഫിസര്‍ ഗ്രാമപഞ്ചായത്തിന് കെടുതി കണക്കാക്കാന്‍ കൈമാറിയ ലിസ്റ്റില്‍ നിന്നാണ് നിരവധി കുടുംബങ്ങള്‍ പുറത്തായത്.
പഞ്ചായത്ത് അസിസ്റ്റന്റ് എന്‍ജിനിയറും ഓവര്‍സിയറുമാണ് അന്തിമ ലിസ്റ്റ് തയാറാക്കിയത്. വ്യാപകമായ ക്രമക്കേടാണ് ലിസ്റ്റില്‍ കടന്ന് കൂടിയത്. കേടുപാടുകള്‍ സംഭവക്കാത്ത കുടുംബങ്ങള്‍ ലിസ്റ്റില്‍ ഉള്‍പ്പെടുകയും വീട് തകര്‍ന്ന കുടുംബങ്ങള്‍ പുറത്താകുകയും ചെയ്തത് പഞ്ചായത്തിനെതിരേ വിമര്‍ശനത്തിനിടയാക്കിയിരുന്നു. പറപ്പൂര്‍ രണ്ടാം വാര്‍ഡില്‍ വാര്‍ഡ് മെമ്പറുടെയും പാലാണിയില്‍ യു.ഡി.എഫ് പ്രവര്‍ത്തകരുടെയും നേതൃത്വത്തില്‍ വീണ്ടും അപേക്ഷ വാങ്ങി എം.എല്‍.എക്ക് കൈമാറുകയായിരുന്നു.എം.എല്‍ എ പഞ്ചായത്ത് ലീഗ് നേതാക്കളോടൊപ്പം കലക്ടര്‍ക്ക് പരാതി കൈമാറി. വിഷയം സര്‍ക്കാറിന്റെ ശ്രദ്ധയില്‍ പെടുത്താമെന്ന് കളക്ടര്‍ ഉറപ്പ് നല്‍കി.