റാന്നി ചെറുകോല്‍ മുരിപ്പേല്‍ വീട്ടില്‍ ഷിനു(34)വിനെ ആണ് കനകക്കുന്ന് പൊലിസ് അറസ്റ്റ് ചെയ്തത്. കോഴഞ്ചേരി നാരങ്ങാനം കാണമുക്ക് ജങ്ഷനില്‍വച്ച് കഴിഞ്ഞദിവസം പുലര്‍ച്ചെ അഞ്ചോടെയാണ് പ്രതി പിടിയിലായത്
ഹരിപ്പാട്: എക്‌സൈസ് സംഘം എന്ന വ്യാജേനയെത്തി സ്വര്‍ണവും പണവും മൊബൈലും തട്ടിയെടുത്ത കേസില്‍ ഒളിവിലായിരുന്ന പ്രതിയെയും അറസ്റ്റ് ചെയ്തു. റാന്നി ചെറുകോല്‍ മുരിപ്പേല്‍ വീട്ടില്‍ ഷിനു(34)വിനെ ആണ് കനകക്കുന്ന് പൊലിസ് അറസ്റ്റ് ചെയ്തത്.
കോഴഞ്ചേരി നാരങ്ങാനം കാണമുക്ക് ജങ്ഷനില്‍വച്ച് കഴിഞ്ഞദിവസം പുലര്‍ച്ചെ അഞ്ചോടെയാണ് പ്രതി പിടിയിലായത്. ആലുവയില്‍നിന്ന് പെയിന്റിങ് ജോലി കഴിഞ്ഞ് മടങ്ങുകയായിരുന്ന ഷിനു കായംകുളം റെയില്‍വേ സ്റ്റേഷനില്‍ വച്ചാണ് മറ്റു പ്രതികളുമായി പരിചയപ്പെടുന്നത്. തങ്ങള്‍ എക്‌സൈസ് ഉദ്യോഗസ്ഥര്‍ ആണെന്ന് ഷിനുവിനെയും ഇവര്‍ പറഞ്ഞു വിശ്വസിപ്പിച്ചു കൂട്ടികൊണ്ടുപോവുകയായിരുന്നു. സംഭവം നടന്നു തിരികെ കായംകുളത്തു എത്തിയ ശേഷമാണ് സത്യം വെളിപ്പെടുത്തുന്നത്.
പിന്നീട് ഇവര്‍ തൃശൂരില്‍ ലോഡ്ജില്‍ ഏതാനും ദിവസം ഒന്നിച്ചു താമസിച്ചശേഷമാണ് പിരിഞ്ഞത്. കേസിലെ മറ്റ് പ്രതികളായ അറാട്ടുപുഴ കള്ളിക്കാട് തകിടിയില്‍ ഹരീഷ്‌കുമാര്‍(ഹരി-31), തൃശൂര്‍ വരവൂര്‍ പുത്തന്‍പീടികയില്‍ ഷെഹീര്‍(24), പാറളം കാവാലില്‍ മണികണ്ഠന്‍(49) എന്നിവരെ കഴിഞ്ഞ ഒന്നിന് തൃശൂരില്‍ നിന്ന് പിടികൂടിയിരുന്നു.
കഴിഞ്ഞ മാസം 23ന് മുതുകുളം തെക്ക് സ്വദേശി സജീവന്റെ വീട്ടിലെത്തിയാണ് തട്ടിപ്പ് നടത്തിയത്. ഹരിപ്പാട് എക്‌സൈസ് ഓഫിസില്‍ നിന്നാണെന്ന് പറഞ്ഞെത്തിയായിരുന്നു തട്ടിപ്പ്.
കളിത്തോക്കുമായി എത്തിയ സംഘം സജീവനെ ഭീഷണിപ്പെടുത്തി മൂന്നുപവന്റെ മാല, ബാഗില്‍ സൂക്ഷിച്ചിരുന്ന 15,000 രൂപ, 12,000 രൂപയോളം വിലവരുന്ന മൊബൈല്‍ എന്നിവയാണ് എടുത്തത്. തട്ടിപ്പിനുശേഷം ഇവര്‍ ഓട്ടോ വിളിച്ചുവരുത്തി കടന്നുകളയുകയായിരുന്നു. എസ്.ഐ ജി.സുരേഷ്‌കുമാര്‍, സി.പി.ഒമാരായ പദ്മരാജന്‍, സബീഷ് എന്നിവരടങ്ങിയ സംഘമാണ് പ്രതിയെ പിടികൂടിയത്.